O‘zbekiston sport kurashlari assosiasiyasi vise-prezidenti mo‘g‘ulistonlik murabbiylarning xatti-harakatini «sirk» deb atadi

O‘zbekiston sport kurashlari vise-prezidenti Shomurod Shofayziev erkin kurash bo‘yicha -65 kilogramm vazn toifasidagi Rio–2016 Olimpiadasining bronza medali uchun o‘zbekistonlik Ixtiyor Navro‘zov va mo‘g‘ulistonlik Ganzorigiyn Mandaxnaran o‘rtasidagi jangda yuz bergan voqeaga o‘z munosabatini bildirdi. Bu haqda «Daryo» xabar bermoqda.

Navro‘zov va Mandaxnaran o‘rtasidagi bellashuv yakuniga 5 soniya vaqt qolganida 7:6 hisobida oldinda borayotgan mo‘g‘ulistonlik sportchi raqibidan ochiqchasiga qocha boshlagani uchun hakamlar o‘zbekistonlik sportchiga 1 ball berishga qaror qilgan edi. Mag‘lubiyatga chiday olmagan Mo‘g‘uliston termasi murabbiylari o‘z kiyimlarini echib tashlagandi.

«Takroriy vaziyatda hakamlarning xatosi bor ekani ko‘rindi. Aslida 2 ball berilishi kerak edi. Mo‘g‘ulistonlik sportchi qochib ketdi-ku. Agar u 2—3 soniya davomida qochmaganida, ball berilmasdi. Lekin unga passivligi uchun ball berildi. Bu haqqoniy, har qaysi murabbiy buni aytadi. Mo‘g‘ulistonliklar g‘alaba ularning cho‘ntagida deb o‘yladi.

Bunday sirkni hayotimda birinchi marta ko‘ryapman. Bu madaniyatsizlik. Bizdan ham ochkolar olib tashlangan, lekin biz echinmaganmiz. Mutaxassislar vaziyatni ko‘rib, g‘alaba sof ekanini aytsin», – dedi Shomurod Shofayziev. “Zamin”ni Telegramʻda oʻqing!