Madrimov Kroufordga yutqazmagani, yana jang qilsa nimani oʻzgartirishi va yangi vaznga oʻtishi haqida (intervyu)

^{Foto: Mark Robinson / Matchroom Boxing}
3 avgust oqshomida AQShning Los-Anjeles shahridagi 22 ming tomoshabin sigʻimiga ega «BMO Stadium» arenasida oʻtgan boks kechasining markaziy jangida super yarim oʻrta vazn toifasida WBA yoʻnalishi chempioni Isroil Madrimov amerikalik Terens Kroufordga qarshi 12 raund jang qilib, hakamlarning ochkolari evazigagina gʻalaba mezbon bokschiga tortiq qilindi.

Oʻzbekistonlik 29 yoshli bokschi engilmas Kroufordga qarshi oʻziga tegishli WBA kamarini alamli tarzda qoʻldan chiqargan boʻlsa-da, jangdan soʻng magʻlubiyatni tan olmadi va revansh soʻradi. Isroil Madrimov bahsdan keyin amerikalik va xorijiy jurnalistlar ishtirokida oʻtgan matbuot anjumanida ham qator savollarga javob qaytarib, Kroufordga qarshi yana jang qilishga shayligini ma'lum qildi. Tribuna.uz matbuot anjumanini tarjima qilib, toʻliq shaklda keltiradi.

- Isroil, jangdan keyingi ilk taassurotlaringiz qanday boʻldi?
- Birinchi navbatda oʻzimni yaxshi his qilayotgandim. Oʻylaymanki, men nimani istagan boʻlsam, oʻsha ishni maromida bajarishni uddaladim. Fikrimcha, bu oʻyinda men magʻlub boʻlmadim, ringda munosib harakat qildim. Bilamiz, Krouford «Pound-for-pound» reytingida birinchi raqamli bokschi, menga qadar unga qarshi jang qilgan Spens va boshqa taniqli bokschilar nokaut bilan toʻxtatilgan, men esa 12 raund davomida etarlicha qarshilik koʻrsatdim. Bu vazn chempioni ekanimni yana isbotlay oldim. Bu jangda yutqazdim deb hisoblamayman. Kamida durang boʻlishi kerak edi.

- Eng kuchli bokschilardan biriga qarshi gʻalabaga yaqin edingiz, bu bahsdan qanday pozitiv xulosalar qildingiz?
- Men butun raundlar davomida jangni nazorat qildim – bu oʻzimga ham yoqdi. Shunday nomdor bokschini bu darajada oʻz nazoratimda ushlay olishimni kutmagandim. Ammo ringda hammasini koʻrsatdim.

- Bu jangdan nima oldingiz?
- Eng avvalo katta tajriba boʻldi. Keyingi faoliyatim uchun bu muhim.

- Jang davomida oʻzingizni keragidan koʻproq sovuqqon tutmadingizmi? Balki, koʻproq agressiv boʻlishingiz kerak emasmidi?
- Jangda nima boʻlgan boʻlsa, barchasi Allohning izni bilan boʻlgan. Nimanidir oʻzgartirishni istamasdim. Men ringda etarlicha jang qila oldim, deb hisoblayman.

- Jang oldidan va jangdan keyin sizda qanday tuygʻular boʻldi? Shunday boʻlishini kutganmidingiz?
- Bu janggacha menda hayajon yoʻq edi, yuz foiz tayyor edim. Jang oldi qoʻrquv ham yoʻq edi, ruhan shay edim va buni isbotladim.

- Bu vaznda oʻz kuchingizni qanday baholaysiz?
- Hozirgi vaznimda anchadan buyon jang qilyapman. Oʻzimni bu vazn toifasida juda yaxshi his qilaman. Bu tabiiy vazn toifam.

- Kroufordning zarba kuchi va texnik jihatlarini qanday baholaysiz?
- Ha, unda ham kuchli zarba bor, texnikasi ham yomon emas. Ammo bugun u bu borada ustun emasdi, tenglik edi.

- Kroufordning Kaneloga qarshi ringga chiqishni istayotgani haqida nima deya olasiz?
- Bu ularning qaysi vazn toifasida jang qilishiga bogʻliq. Agar Kaneloning vazn toifasida jang qilishsa, unda Kroufordga juda qiyin boʻladi. Chunki vazn yuqoriligi baribir oʻz ta'sirini koʻrsatadi.

- Bugun 12-raundni yutsangiz durang boʻlardi, 11-12-raundda ustunlikga erishgan taqdirda gʻolib boʻlishingiz mumkin edi. Hozir nimadan afsuslanayapsiz, soʻnggi raundlarda nima oʻzgartirish mumkin edi?
- Afsuslanayotganim yoʻq. Bu Xudoning amri, hech narsani oʻzgartirishni istamasdim. Jangdan oldin juda koʻpchilik «Krouford Madrimovni koʻpi bilan 8-raundgacha nokaut bilan toʻxtatadi», deyishgandi. Ammo men butun dunyoga oʻz kuchimni koʻrsatdim. Oʻzim, jamoam, vatanim, muxlislar uchun munosib jang qila oldim va ular ham jangimdan qoniqishdi.

- Soʻnggi raundlarda qanchalik toliqqan edingiz?
- Ozroq charchoq alomatlari bor edi, ammo men 12 raund turib bera oldim. Oʻzimga boʻlgan ishonchim yuqori edi.

- Jangda rejangiz qanday edi?
- Shoshilmaslik, raqibni muvozanatdan chiqarib, kirib borish edi. Oʻz rejamni amalga oshira oldim.

- Bugungi yirik voqealik va jang Oʻzbekiston uchun qanday ahamiyatga ega edi?
- Oʻzbekiston uchun ham katta jang va tarixiy voqealik edi. Chunki mamlakatimizda sportga, boksga juda katta e'tibor berilyapti. Bugungi jangni ham Oʻzbekistonda intiqlik bilan kutishgandi, qoʻllab-quvvatlab turishdi. Yangi tarix yaratish uchun mendan gʻalaba kutishgandi. Shunga qaramay, yaxshi jang oʻtkazganimdan hamma xursand. Amerikada ham koʻpchilik suratimni koʻtarib olganini, kimdir mamlakatimiz bayrogʻini koʻtarganini koʻrdim. Bu men uchun ham, mamlakatim uchun ham faxrli.

- Jangning ikkinchi qismida koʻproq hujum qilishni istaganmidingiz yoki barchasi reja asosida edimi?
- Hammasini reja asosida qildim. Chunki Terens singari raqibga qarshi jangni nazorat qilishni oʻzi boʻlmaydi. Hech kim bunday qila olmagan. Men esa qila oldim va barchaga chempionligimni yana bir bor koʻrsata olganimdan xursandman.

- Krouford uchun Benavidesga qarshi janglar jismoniy jihatdan sizga qarshi oʻtgan bellashuvdan qiyinroq boʻlgan edi. Bu borada nima deya olasiz?
- Boʻlishi mumkin, ammo u Terensga qarshi 12-raundgacha turib bera olmagan. Men esa munosib qarshilik qila oldim.

- Agar Kroufordga qarshi yana ringga chiqsangiz, boshqacharoq jang qilgan boʻlarmidingiz?
- Urinib koʻrardim, qoʻrquv yoʻq. Chunki men chempion edim va hozir ham muxlislar uchun chempionman. Unga qarshi yana yaxshiroq jang qilishim mumkin.

- Kamarni himoya qilish va kamar uchun jang qilish masalasida qanday farqlarni koʻrdingiz? Bu borada hakamlarning munosabati turlichami?
- Biz uchun buning farqi yoʻq, imkoniyat berishsa jang qilamiz. Qaysidir kamar uchun jangmi yoki boshqa darajadagi bahsmi – farqi yoʻq, tayyorman.

- Chempion sifatida yoki chempionlik kamari uchun ringga chiqish kerak boʻlsa, jangga turlicha munosabatda boʻlasizmi?
- Yana bir marta chempionlik jangini oʻtkazishga harakat qilamiz.

- 72 kg vaznga chiqishni istarmidingiz?

- Menga farqi yoʻq. Agar katta janglar tashkil qilinsa, men bu vaznda ham jang qilishga tayyorman. Katta janglarni va ularda bugungidek sensatsiyalar qilishni yaxshi koʻraman, - deydi Isroil Madrimov Terens Kroufordga qarshi kechgan jangdan keyin oʻtkazilgan matbuot anjumanida.

Krouford Madrimovga qarshi jangdan keyin: «U juda kuchli, tezkor va mendek intizomli»

Terens Krouford ham Isroil Madrimovga qarshi jangdan keyin matbuot anjumanida ishtirok etdi va oʻzbekistonlik raqibini maqtadi.

«Isroilning yuqori vaznga oʻtishidan choʻchiymanmi? Yoʻq, chunki Madrimov 72-76 kg vaznda ham bemalol raqobat qila olardi. Havaskorlar boksida u bundanam yuqori vaznlarda jang qilib, muvaffaqiyatga erisha olgan. U katta, juda kuchli va baquvvat. U oyoqda juda tezkor, gavdasi bilan yaxshi ishlaydi va menga oʻxshagan intizomli bokschi», - deydi Terens Krouford jangdan soʻng.

“Zamin” yangiliklarini “Telegram”da kuzatib boring