Qirg‘iziston prezidenti qirg‘iz, qozoq va o‘zbekistonlik muxlislarning hamjihatligini qayd etdi

Qirg‘iziston prezidenti Sadir Japarov qirg‘iz, qozoq va o‘zbekistonlik muxlislarning hamjihatligini qayd etdi.

“Xorijda sportchilarimiz o‘rtasida iliq tuyg‘ular, g‘alabalar quvonchini baham ko‘rgan, quchoqlashib, qo‘llab-quvvatlagan lahzalari uch xalq o‘rtasidagi azaliy do‘stlik, oilaviy rishtalar, yaxshi qo‘shnichilik munosabatlarini yanada mustahkamlaganiga qat’iy ishonaman.

Qirg‘iz, qozoq va o‘zbek xalqlarining o‘zaro hamjihatligi kelajakda ham mustahkamlanib boraversin”, — deydi Sadir Japarov Olimpiya sovrindorlarini taqdirlash marosimida.


Eslatib o‘tamiz, Parij Olimpiadasida O‘zbekiston delegatsiyasi 8 ta oltin, 2 ta kumush va 3 ta bronza medalini, Qirg‘iziston delegatsiyasi 2 ta kumush va 4 ta bronza medalini, Qozog‘iston esa bitta oltin, 3 ta kumush hamda 3 ta bronza medalini qo‘lga kiritdi.