Qirg‘iz Respublikasi ustozi: "Biz raqibga bir qancha noqulayliklar tug‘dirdik. Bugun ularni hayron qoldira oldik"

Qirg‘iz Respublikasi terma jamoasi bosh murabbiyi Maksim Lisitsin JCH-2026 saralashidan o‘rin olgan O‘zbekistonga qarshi o‘yindan keyin o‘z fikrlarini bildirdi.

"Bunday o‘yinlarda maydonga tushish qiyin ish. Men yigitlarga ko‘rsatgan o‘yinlari uchun minnatdorchilik bildirdim. Chunki ular bu o‘yinlarga tayyorgarlik jarayonida katta hajmdagi ishni bajarishdi, bizga umid bera olishdi. Biz rostdan ham ochko olishni istagandik, afsuski, buni iloji bo‘lmadi. Bu kabi yuqori darajada yetarli tajribamiz bo‘lmagani uchun emotsiyalarimizni jilovlay olmadik. Shu sababli bugungi o‘yin bizning foydamizga hal bo‘lmadi.

Tayyorgarlik uchun qisqa vaqt bo‘lishiga qaramay, bugungi o‘yinga yaxshi tayyorlandik, tarkibni tanladik. Siz Alikulovni Kenjabayevga almashtirganim haqida gapirdingiz, ammo tarkibda juda ko‘p o‘zgarishlar bo‘lgandi. O‘yin payti ham ko‘rdikki, bu o‘zgarishlar raqibga bir qancha noqulayliklar tug‘dirdi. Ikkita gol urdik, ammo qayerdadir biroz tavakkal qildik. Futbolda tavakkal qilish kerak.

Bugun raqibni kutilmagan holatlar bilan hayron qoldira oldik. Har safar ham bunday bo‘lmadi, raqibga ham yetarlicha ko‘p imkoniyat qoldirdik va ular o‘z vaziyatlaridan foydalanib ketishdi. Biz kerakli xulosani chiqaramiz va tayyorgarlik ko‘rishda davom etamiz. Bunday o‘yinlar jamoa uchun, ayniqsa, yosh futbolchilar uchun tajriba bo‘ladi. Keyingi yig‘inlarda yanada kuchliroq bo‘la olamiz deb o‘ylayman", - deydi Maksim Lisitsin. “Zamin” yangiliklarini “Facebook”da kuzatib boring