“Roma” klubi faoliyatini yoritib kelayotgan romaforever.it sayti eksperti Eulio Benatti A Seriyaning to‘rtinchi turidan o‘rin olgan “Jenoa”ga qarshi uchrashuv oldidan Eldor Shomurodov faoliyatiga nazar soldi va Genuyadagi o‘yinda undan yana qahramonlik kutmoqda.
Genuyadagi o‘yin musobaqa jadvalidagi holat bo‘yicha Daniele De Rossi uchun juda muhim. Rimliklar hali g‘alaba nashidasini surgani yo‘q. “Roma” Genuyadan uch ochko olib ketishga urinadi.
Bo‘lajak bahs “Roma”ning ikki o‘yinchisi – Stefan El-Shaaravi va Eldor Shomurodov uchun ham tarixiy ahamiyatga ega.
Stefan El-Shaaravi katta futbolga aynan “Jenoa”da qadam qo‘ygan. Klub tarbiyalanuvchisi 2008-2010 yillar davomida Genuya shahri jamoasi sharafini himoya qilgan.
Shuningdek, rimliklarning o‘zbekistonlik legioneri Eldor Shomurodovning Italiyadagi sarguzashtlari ham “Jenoa”dan boshlangan. Shu bois, Shomurodovning boshlang‘ich tarkibda maydonga tushishga urinayotganini to‘g‘ri tushunish kerak.
Yangi mavsumda “Roma”ning yagona goli muallifi bo‘lib turgan 29 yoshli hujumchi O‘zbekiston terma jamoasi safida jahon chempionatining saralash uchrashuvlarida ishtirok etib keldi. Shomurodov terma jamoadan quruq qaytgani yo‘q, rasmiy uchrashuvda yana to‘p kiritishni uddaladi. Uning o‘yinini tanqid qilib bo‘lmaydi.
Hujumchi Rimga yaxshi kayfiyat, o‘zgacha ishtiyoq bilan qaytdi. Daniele De Rossi yoqtirgan hujumchi Artyom Dovbik jarohat tufayli Ukraina terma jamoasida kutilgan o‘yinlarni o‘tkaza olmadi. O‘tgan mavsum La Ligada to‘purar bo‘lgan futbolchini mushaklaridagi og‘riqlar bezovta qilgani Eldor Shomurodovni sobiq jamoasiga qarshi ilk daqiqalardan o‘ynash ehtimolini oshirib yubordi.
Shu o‘rinda, o‘zbek futbolchisining pandemiyadan oldin – 2020 yili Genuyaga kelganini esga olish lozim. Uni Leguriyaga Rostovdan olib kelishgan edi. “Jenoa” safida Shomurodov debyut mavsumida sakkizta gol urdi, shundan beshtasi genuyaliklarning uy stadioni “Luidji Ferraris” arenasida kiritildi.
Bu gollar Eldorni Rimga yetakladi. “Roma” qariyb 20 million yevro evaziga uni tarkibiga qo‘shib oldi. Keyinchalik tajribali hujumchi “Spetsiya” va “Kalyari” jamoalarida ham o‘ynab keldi.
Yozda “Roma” Shomurodovdan to‘liq voz kechishga uringandi. Taqdirning hazilini qarangki, hujumchining “Atlanta Yunayted”ga transferi so‘nggi pallada barbod bo‘ldi. “Empoli”ga qarshi bahsda Eldor o‘ziga berilgan 13 daqiqa ichida gol urib, Daniele De Rossining fikrini o‘zgartira oldi.
Shomurodov “Luidji Ferraris” stadionidagi oxirgi golini 2021 yilning 15 mayida “Jenoa” safida “Atalanta” darvozasiga kiritgan edi. O‘shanda Perluiji Gollini qo‘riqlagan darvozani o‘zbek hujumchisi ikki marta ishg‘ol qilgan.
Eng qizig‘i, “Jenoa” – “Roma” uchrashuvida mezbonlar darvozasini yana o‘sha posbon Perluiji Gollini qo‘riqlaydi. Mutaxassislar jarohatdan tiklangan Artyom Dovbik hali sport formasini to‘liq tiklab olmaganini inobatga olib, Shomurodovning o‘yinda qatnashish ehtimoli yuqori ekanini ta’kidlamoqda. Eldorga maydonda qancha vaqt berilishidan qat’i nazar, u o‘zi uchun qadrdon bo‘lib qolgan arenada yana porlashi kutilyapti...
“Jenoa” – “Roma” bahsi bugun Toshkent vaqti bilan 15:30 da boshlanadi. “Zamin” yangiliklarini “Youtube”da kuzatib boring
Ctrl
Enter
Xato topdIngizmi?
Iborani ajratib Ctrl+Enter tugmasini bosingMavzuga oid yangiliklar
“Hizbulloh” bir sutkada Isroilga qarshi 20 ga yaqin harbiy amaliyot o‘tkazdi
Xalqaro jinoyat sudi Isroil bosh vaziri Netanyaxuni hibsga olishga order berdi
2026 yilda bo‘lajak mundialning favoritlari reytingi taqdim etildi
Qozog‘iston Ukraina atrofidagi vaziyat tufayli harbiy va fuqarolik obyektlari xavfsizligini kuchaytirdi
Italiya sudi Quddus Isroil poytaxti emasligi haqida qaror chiqardi
Xalqaro jinoyat sudining orderi Isroilni nega qo‘rqityapti?
Shavkat Mirziyoyev Rossiya bosh prokurori bilan uchrashuv o‘tkazdi
22 noyabr kuni Cobalt avtomobiliga shartnoma ochilishi e’lon qilindi
