Masharipovga joy topish uchun “qurbon” qilinayotgan Fayzullaev... Terma jamoa hujum chizigʻi nega kuchsiz?

Oʻzbekiston termasi Eron bilan durang oʻynadi. Bir qarashda bu natija qoniqarli va milliy jamoa hali ham guruh yetakchisi boʻlib qolmoqda. Ammo kechagi 1 ochkolik durang himoyachilar va darvozabonning ishonchli harakati orqali yuzaga keldi.

“Lans” himoyachisi Abduqodir Husanov va “Rubin” klubi futbolchisi Rustam Ashurmatov, Turkiya chempionatida harakat qilayotgan Husniddin Aliqulov juda yaxshi oʻyin koʻrsatdi. Ammo hujum va yarim himoyadagi bogʻlamlarda uzilishlar kuzatildi.

Ayniqsa, Abbosbek Fayzullaev harakat qilgan oʻng qanotda aytarli xavfli vaziyatlar yuzaga kelmadi. Sofascore nashri futbolchining harakatlarini 6,9 ballga loyiq koʻrdi. Abbosbek uzatgan 14 toʻpdan faqat 7 tasi aniq yetib bordi. 3 bora raqiblarini oʻz texnikasi bilan aldab oʻtishga urindi, ammo hammasi samarasiz yakunlandi. Toʻp uchun kurashda 4 bor raqiblarni oʻtkazib yubordi. Nega u ishonchli harakat qila olmadi?

Oʻzbekiston milliy jamoasi yordamchi murabbiyi oʻyindan keyingi matbuot anjumanida Vlado Radmanovich bizda hujumkor futbolchilar yoʻqligini ma'lum qildi. Yana statistik ma'lumotlar bilan ishlovchi Sofascore ma'lumotlarini oʻrganamiz. Balki, murabbiylar hozirgi paytda ajoyib sport formasidagi Abbosbekning imkoniyatlaridan toʻgʻri foydalana olmayotgandir?

^{Foto: Sofascore}
Ushbu rasmdan koʻrish mumkinki, Abbosbek asosan chap qanotda koʻp harakat qiladi, uning oʻng qanotdagi harakatlari faqat Oʻzbekiston termasida boʻlsa kerak. Uning aynan oʻsha qanotdagi reydlari rus klubining gʻalabalariga hissa qoʻshyapti.

^{Foto: Sofascore}
Olimpiadadagi ishtirokdan soʻng Abbosbek Fayzullaev yana klubdagi eng samarali futbolchilardan biriga aylanib bormoqda. Oʻtkazilgan oʻyinlarda 2 bor raqiblar darvozasiga gol urdi, 4 bora gollarga assistlik qildi. Uchrashuvlarda eng yaxshi oʻyinchi deb e'tirof etilmoqda. Statistikadan koʻrinib turibdiki, uning klubdagi oʻyinlarda foydasi katta. Oʻtkazilgan 10 oʻyindan 3 tasida u 7 balldan kamroq baholandi. Bularning barchasi milliy jamoaga toʻgʻri kelayotgani tasodif emas.

Sababi Abbosbek oʻziga noqulay oʻng qanotda oʻynamoqda. Terma jamoa murabbiylar shtabi Jaloliddin Masharipovga tarkibdan joy topish uchun Abbosni “qurbon” qilmoqda.

Toʻgʻri, Eron chempionatida oʻynayotgan futbolchining tajribasiga shubha yoʻq. Ammo nahotki, ikki futbolchini termada foydaliroq oʻyin koʻrsatishi uchun joylashtirishning iloji boʻlmasa? Balki Masharipovga 9 lik zonada harakatlanuvchi pozitsiyani berib, Abbosni joyiga qaytarish kerakdir?

Abbosning oʻzi ham markazda yaxshiroq oʻynaydi. Oʻsha hujumchi ortidagi pozitsiyaga Fayzullaevni qoʻyish orqali unga darvozaga yorib kirish yoki uzoqdan zarba berish imkonini berish kerakdir. “SSKA”ning yangi mavsumdagi ikki goliga mualliflik qilgan Abbos gollarni jarima maydoni tashqarisidan urgan. Aynan mana shu imkoniyat berilsa, hujumkor yarim himoyachi oʻzini koʻrsatishga koʻproq imkoniyat paydo boʻlishi mumkin.

^{Foto: Sofascore}
Kechagi oʻyinda eng yomon koʻrsatkichlardan biriga Odiljon Hamrobekov egalik qildi. BAA bilan oʻyinda Otabek Shukurovni tayanch zonaga qaytarib, Abbosbek Fayzullaevni Hamrobekov oʻrniga tushirib, Shomurodovning ortida oʻynaydigan futbolchiga aylantirish variantini koʻrib chiqish kerak.

Shomurodovning hujumda yakkalanib qolayotganini koʻrish mumkin. Toʻpni koʻpincha darvozaga teskari holatda qabul qilayotgan Eldorga Abbosbek Fayzullaev juda yaxshi yordamchi vazifasini bajarishi, aynan u himoyachilarni chalgʻitgan holda Abbosga zarba berish yoki darvozani yorib kirish imkonini yaratib berishi mumkin.

Oston Oʻrunov yaxshi jismoniy holatda boʻlsa, uni oʻngga qoʻyish orqali hujumkor tarkibni shakllantirish mumkin.

BAA bilan oʻyinda quyidagi tarkibda boshlab, keyinchalik tarkibga jalb qilingan Diyor Xolmatov, “Nasaf” futbolchisi Mozgovoy va “Navbahor” futbolchisi Iskandarov bilan yarim himoyani toʻliq qayta yangilash mumkin.

Hujum chizigʻida bizda rostdan muammolar mavjud. Eldor Shomurodov klubda yetarlicha oʻyin amaliyotiga ega boʻlmayapti. Katanes esa uning oʻrnini bosadigan futbolchi topa olmayapti yoki izlab ham koʻrmayapti. “Dinamo” futbolchisi Anvar Xojimirzaev ajoyib formada ekanini hamma mutaxassislar e'tirof etyapti. Ammo turli sabablar bilan jamoa lagerini tez-tez tark etayotgan, avval boshidanoq jamoaga yangi futbolchini qoʻshmasligini ta'kidlagan bosh murabbiydan yangilik kutish nooʻrin.

Shunday ekan bor futbolchilar potentsialini ochib berish uchun ham ularni oʻzlarini erkin his qiladigan pozitsiyalarga tushirish kerak. Keyin jamoa zaxirasidagi futbolchilar ham oʻrindiqni isitish uchun kelmayapti, 11 kishi bilan jamoa boʻlmaydi. Ulardan ham unumli foydalanish zarur.

BAA bilan oʻyinda butunlay boshqacha gʻoyalar bilan maydonga tushadigan jamoani kutib qolamiz. Zero ushbu oʻyindagi gʻalaba Oʻzbekiston orzusi — Jahon chempionatiga yoʻlni anchagina yaqinlashtiradi.

“Zamin” yangiliklarini “Telegram”da kuzatib boring