Shomurodov “Roma”dan ketgani ma'qulmi yoki qolgani?

Italiya futbolini yoritayotgan manbalar “Roma” hujum chizigʻidagi vaziyatni tahlil qilmoqda. Xususan, oʻtgan yoz “Jirona”dan katta summaga transfer qilingan Ispaniya chempionati toʻpurari Artyom Dovbik rimliklarga samara keltirib, oxirgi uchrashuvlarda muntazam gol urmoqda.

Biroq zamonaviy futbolda bir oʻyinchi har doim barcha oʻyinlarda ishtirok eta olmaydi. “Roma”da ukrainalik futbolchidan tashqari faqatgina bitta markaziy hujumchi – Eldor Shomurodov bor.

29 yoshli oʻzbek legioneriga yangi bosh murabbiy Ivan Yurich ham etarli darajada oʻyin amaliyoti berayotgani yoʻq. Shomurodov avvalgidek faqat soʻnggi daqiqalarda maydonga tushirilyapti. Besh-oʻn daqiqa nafaqat oʻzini koʻrsatish, balki oʻyinga kirishib ketish uchun ham etmay qolyapti.

“Roma” qishki transferlar vaqtida bir necha oʻzgarishlarni amalga oshirmoqchi. Ulardan biri Eldor Shomurodov oʻrniga Artyom Dovbikka oʻrinbosar olib kelish. Rimliklarning moʻljali avval “Udineze”da toʻpurarlik mahoratini namoyish qilib, “Everton”ga oʻtganidan keyin zaxiraga mixlanib qolgan portugaliyalik Betoni transfer qilishdan iborat.

Ayni paytda ikki manba “Roma”ga “Shomurodov ma'qulmi yoki Betoni transfer qilish kerakmi?”, degan mavzuda mulohaza yurityapti.

AZSCORE.FR:
“Roma” Ispaniya chempionati toʻpurari Artyom Dovbikni “Jirona”dan olish uchun ancha mehnat qilishiga toʻgʻri keldi. Rimliklar ukrainalik hujumchi uchun kurashda bir necha klublar, xususan, Dovbikni Ispaniyada olib qolishga uringan “Atletiko Madrid” bilan jiddiy raqobatga kirishdi.

Artyom Dovbik “Roma”da toʻpurarlik mahoratini namoyish qila boshlaganidan keyin Rim klubi mutasaddilari endi Eldor Shomurodovni toʻliq transfer qilish yoki ijaraga berib yuborishni rejalashtiryapti.

Bu yoʻl orqali klub oʻzbek hujumchisining muntazam oʻyin amaliyotiga ega boʻlishiga yordam bermoqchi. Ular Artyom Dovbikka oʻrinbosar sifatida “Everton”dagi portugaliyalik hujumchi Betoni olib kelish payida. Ilgari “Udineze”da oʻynab, tajriba toʻplagan bu oʻyinchi Angliya jamoasida asosan zaxirada qolib ketmoqda.

CHIESADITOTTI.COM:
Mavsumning boshidayoq Eldor Shomurodov nihoyat “Roma”ga munosib oʻyinchi boʻlibdi, degan fikr uygʻongan edi. Lekin oxirgi xabarlarga qaraganda, klub uning oʻrniga boshqa markaziy hujumchi qidirayotgan ekan.

“Jenoa”da sakkizta gol urganidan keyin 2021 yili 20 million evro atrofidagi mablagʻ evaziga “Roma”ga olib kelingan Shomurodovga katta umid bogʻlangandi. Lekin vaqt oʻtishi bilan oʻzbek futbolchisi zaxira oʻyinchisiga aylanib qoldi. “Spetsiya” va “Kalyari”dagi ijara muddatlari ham etarli saramara bermadi.

Yangi mavsum boshida Eldor Shomurodov “Empoli”ga qarshi uchrashuvda oʻziga berilgan bir necha daqiqa ichida gol urdi. Shu gol tufayli “Roma”da olib qolingan oʻzbek futbolchisi zaxiraga mixlandi va 25 avgustdan beri barcha musobaqalarda jami 108 daqiqa harakat qildi xolos.

Endi “Roma” mutasaddilari 2021-2023 yillarda “Udineze”da oʻynab, A Seriyada 21 ta gol urgan Betoni olib kelmoqchi. Portugaliyalik hujumchi 25 million evro evaziga 2023 yilning avgustida “Everton”ga koʻchib oʻtdi. Hozirga qadar 43 ta bellashuvda oltita gol urdi.

Bizningcha, “Roma” yana bir samaradorligi past hujumchi olishiga ehtiyoj yoʻq. Chunki Eldor Shomurodovning amaldagi shartnomasi 2026 yilning yozigacha davom etadi. Qolaversa, Betoning shartnomasi yana uch yil davom etadi va maoshi ham har mavsum uchun ikki million evrodan oshadi. Bu holatda Eldor Shomurodovdan foydalanish yaxshi echim boʻlib qolmoqda. “Zamin” yangiliklarini “Telegram”da kuzatib boring