A Seriya jamoasi yanvarda Eldor Shomurodovni oladigan boʻlyapti...

“Kalyari” joriy mavsumda ham Italiya chempionati yuqori divizionida qolish uchun kurashishga majbur boʻlmoqda.

Oʻtgan chempionatda sardiniyaliklar hozir “Roma” vakillari hisoblangan bosh murabbiy Klaudio Raneri va Eldor Shomurodov yordami bilan A Seriyadagi oʻrnini saqlab qolgan edi.

Hozir “Kalyari”ni Davide Nikola boshqarmoqda va bu mutaxassis jamoani xavfli hududdan olib chiqish uchun yanvarda yangi oʻyinchilar olish kerakligini ta'kidlamoqda.

Davide Nikola birinchi navbatda hujum chizigʻidagi muammolarni bartaraf etishi kerak. Chunki golsiz natija boʻlmaydi. “Kalyari” chempionatda eng kam toʻp kiritgan jamoalardan biri. Sardiniyaliklar 18 ta uchrashuvdan teng yarmida maydonni golsiz tark etgan. Soʻnggi toʻrtta uchrashuvda Davide Nikola shogirdlari bir marotaba toʻp kirita oldi, xolos.

Nufuzli manba – La Gazzetta dello Sport nashrining yozishicha, “Kalyari” rahbariyati va murabbiylar shtabi jamoaga foyda keltirishi mumkin boʻlgan hujumchi sifatida Eldor Shomurodovni tanladi.

- Oʻzbek legioneri “Kalyari”ning hujum chizigʻidagi muammolariga yaxshi echim boʻlishi mumkin. Yozda ijara muddati tugab, Sardiniyadan poytaxtga qaytgan futbolchining “Roma”dagi oʻyin vaqti juda chegaralangan. Bu holat Shomurodovning yanvarda “Kalyari”ga qaytib, jamoa hujum chizigʻini kuchaytirishiga yoʻl ochishi mumkin, - deb yozmoqda italiyalik jurnalist Silvio Salimbene.

“Kalyari”ning Eldorga qiziqishi jiddiy ekanini bir necha boshqa manbalar ham tasdiqlab, transferga oid munosabatlarni e'lon qilyapti.

- Shomurodov oʻtgan mavsumda Sardiniya klubi va uning muxlislarida oʻzidan ijobiy taassurot qoldirgan. Mavsumning muhim pallasida oʻz oʻyinlari, gollari va assistlari bilan jamoaning A Seriyada qolishiga hissa qoʻshganini hech kim unutgani yoʻq. Oʻzbek futbolchisi Davide Nikola uchun oldingi chiziqdagi boʻshliqlarni toʻldirishda yaxshi echim boʻladi. Chunki Eldor katta tajribaga ega, jismonan baquvvat va hujumning bir necha pozitsiyasida samarali oʻynay oladigan charm toʻp ustasi, - deb yozmoqda tuttocagliari.net portali.

- “Kalyari” va Eldor Shomurodovning yangi hamkorligi boʻyicha muzokaralarning qanday kechishi “Roma”ning oʻyinchi boʻyicha yakuniy qarori va moliyaviy vaziyatga bogʻliq. Qishki transferlar davri oʻzbek legionerining kelajagini belgilashda muhim palla boʻladi. Shomurodov “Kalyari”ga oʻtadigan boʻlsa, muntazam oʻynash imkoniga ega boʻladi, - deb yozdmoqda La Gazzetta dello Sport nashri.

- “Kalyari”ga zudlik bilan yangi oʻyinchilar kerak. Hujum chizigʻi gol urolmayapti. Jamoa ketma-ket toʻrtta magʻlubiyatdan keyin xavfli hududga tushib qolgan va oʻz kuchiga boʻlgan ishonchni yoʻqotib qoʻyishi mumkin.

Klub sport direktori Bonato “Roma”ning zaxiradagi markaziy hujumchisi Eldor Shomurodovni yana Sardiniyaga qaytarishga bel bogʻlagan va tez kunda bu transferni amalga oshirishga kirishadi, - deb ma'lumot chiqardi La Nuova Sardegna gazetasi.

Eldor Shomurodov oʻtgan mavsumda “Kalyari”da oʻynab, oʻz hisobiga uchtadan gol va assist yozdirib qoʻygan edi. Bu gal 29 yoshli hujumchimiz A Seriya va Italiya kubogi doirasida jami 9 ta uchrashuvda ikkita gol va bitta assist muallifi boʻldi. “Zamin” yangiliklarini “Telegram”da kuzatib boring