Italiyada qishki transfer bozori ochildi: Eldor Shomurodov qaysi jamoaga oʻtadi?

Italiyada qishki transfer bozori ochildi va 2 fevralga qadar davom etadi. A Seriya klublari bir oy davomida oʻz tarkiblarini tartibga solib olishga harakat qiladi.

Jumladan, tajribali mutaxassis Klaudio Raneri boshqaruvidagi “Roma”da ham bir necha oʻzgarishlar boʻlishi kutilmoqda. “Boʻrilar” safini tark etishi oydinlashib borayotgan oʻyinchilardan biri Eldor Shomurodov hisoblanadi.

Italiya futbolini yoritib kelayotgan manbalar, xususan, romaforever.it portali eksperti Luka Mugnayoli Rim klubining transfer siyosati va Eldor Shomurodov kelajagi boʻyicha quyidagi ma'lumotlarni ma'lum qildi.

- Eldor Shomurodov avvaliga ijaraga oʻtib, mavsum yakunlanganidan keyin boshqa klubga toʻliq transfer qilinishi kutilmoqda. “Roma” esa, oldingi chiziqda Artyom Dovbik bilan raqobatlasha oladigan va zarur vaqtda u bilan birga oʻynay oladigan markaziy hujumchi qidiryapti.

Hozircha, poytaxtliklar Eldor Shomurodov oʻrniga “Everton”dan Beto va “Napoli”dan Jakomo Raspodorini olib kelish boʻyicha rejalarini amalga oshirishga bel bogʻlagan, - deb yozmoqda. romaforever.it portali eksperti Luka Mugnayoli.

Eldor Shomurodov darajasidagi hujumchi “Roma”ga kerak boʻlmay qolganiga qaramay, uning xaridorlari safi kengayib bormoqda. Soʻnggi ma'lumotlarda aylatilishicha, A Seriyaning toʻrt klubi 29 yoshli oʻzbek futbolchisini oʻz safiga chorlamoqda.

“Kalyari”

Sardiniya klubi Eldor Shomurodovni oʻtgan yili jamoani yuqori ligada olib qolishga qoʻshgan hissasini inobatga olib, bu mavsum ham uni ortga qaytarmoqchi. Aslida “Kalyari” Shomurodovni yozda toʻliq transfer qilmoqchi boʻlgandi. “Roma” soʻragan narx ularga ogʻirlik qildi.

Bu gal ham ligadagi joyini saqlab qolish uchun kurashayotgan sardiniyaliklar oldingi chiziqda muammolarga duch kelmoqda va bu holatni oʻzbek futbolchisi yordamida hal qilishga urinib koʻradi.

“Empoli”

Joriy chempionatda “Empoli” darvozasiga birinchi golni aynan Eldor Shomurodov urdi. Bu gol rimliklar uchun ham mavsumdagi ilk kiritilgan toʻp boʻldi. Gol oʻzbek hujumchisi uchun asosiy tarkibga yoʻl ochib bergani yoʻq.

Lekin “Empoli” Eldorga oʻyin amaliyoti berishga tayyor. Bu jamoa yozda “Roma”dan norvegiyalik hujumchi Ola Solbakkenni olgandi. Ular poytaxt klubi bilan aynan shu hamkorlikni davom ettirib bu gal Eldor Shomurodovni berishni soʻrayapti.

“Komo”

Yaqin oʻtmishning mashhur yulduzi Sesk Fabregas bosh murabbiylik qilayotgan “Komo” anchadan beri Shomurodovga qiziqish bildirib kelmoqda. Fabregas A Seriya debyutanti safiga Pepe Reyna, Alberto Dossena, Rafael Varan, Serxi Roberto, Niko Pas, Semone Verdi, Patrik Kutrone va “Roma”ning sobiq hujumchisi Andrea Belotti kabi nomdor yulduzlarni qoʻshib olishga muvaffaq boʻldi.

Biroq jamoa hujum chizigʻidan oʻrin olgan oʻyinchilar orasida Kutronedan boshqasi ishonchni oqlay olmayapti. Fabregas chempionatning ikkinchi yarmiga tayyorgarlikni oldingi chiziqni kuchaytirishdan boshlamoqchi.

“Venetsiya”

Xaridorlar qatoriga qoʻshilgan “Venetsiya” yaqinda “Napoli”dan hujumchi Adessio Zerbinani oldi. Shunga qaramay, venetsiyaliklarga Eldor Shomurodov kerak. Bu jamoani oʻzbek legionerining oldingi chiziqda bir necha pozitsiyada oʻynay olishi, qanotlardan ham hujum uyushtirish imkoniyati kengligi, bir soʻz bilan aytganda universalligi jiddiy qiziqtirib qoʻygan.

Ta'kidlash joizki, bu mavsum oʻrtasida Eldor Shomurodovning transfermarkt portalidagi narxi bir millionga arzonlab 4 million evroga tushdi.

“Roma” rahbariyati yanvar oyida biror oʻyinchini toʻliq sotib yuborish qiyinligini yaxshi biladi. Shuni inobatga olganda, poytaxtliklar Raneri rejasiga kiritilmagan futbolchilarni, xususan, Eldor Shomurodovni ham keyinchalik sotib olish huquqi yoki majburiyati bilan mavsum oxiriga qadar ijaraga berishga tayyor. “Zamin” yangiliklarini “Vkontakti”da kuzatib boring