“Roma” Shomurodovni qachon va qaysi jamoaga qoʻyib yuboradi?

Qishki transferlar oynasi yopilguniga qadar Oʻzbekiston milliy terma jamoasi sardori va eng zoʻr toʻpurari Eldor Shomurodov kelajagiga ham oydinlik kiritilishi kerak.

Ayni paytda hamyurtimiz poytaxt “boʻrilari” bilan birga mashgʻulotlarda zoʻr berib ishlab yuribdi. Klub mutasaddilari uning kelajagi boʻyicha bir qarorga kelishi kerak. Italiya matbuoti oʻzbek hujumchisiga ish berishga tayyor klublar etarli ekanini yozmoqda.

Xususan, qishki transfer bozori ochilganidan keyin 29 yoshli oʻzbek hujumchisiga “Empoli”, “Kalyari”, “Venetsiya” va “Parma” kabi klublar qiziqayotgani haqida ma'lumotlar chiqarilmoqda.

Bu jamoalarning barchasi Eldor Shomurodov keyinchalik sotib olish huquqi bilan ijaraga berishni soʻramoqda. “Roma” rahbariyati esa, har doimgidek xaridorlarga oʻyinchini mavsum yakunlanganidan keyin sotib olish majburiyatini yuklashga harakat qilmoqda.

Nufuzli manbalardan biri – vocegiallorossa.it saytining ma'lum qilishicha, Eldor Shomurodov uchun kurashda “Empoli” favoritga aylandi.

Il Corriere della Sera gazetasi ham toskanaliklar oʻzbek futbolchisi boʻyicha “Roma” bilan muzokara olib borayotgani va oʻzaro aloqalar ijobiy ketayotgani haqida ma'lumot tarqatdi.

Eldorga da'vogar boʻlgan “Kalyari” esa, transferni oxiriga etkazishdan avval, oʻz tarkibida oʻzgarish boʻlishini kutishiga toʻgʻri kelyapti.

Yanada aniqroq aytadigan boʻlsak, sardiniyaliklar oldingi chiziqqa yangi oʻyinchi olish uchun jamoaning tajribali forvardi Janluka Lapadulaning boshqa klubga oʻtishini kutishi kerak. Perulik futbolchi hozir V Seriyaning bir necha klublari bilan muzokaraga kirishgan.

Futbol selektsioneri sifatida faoliyat yuritayotgan sobiq futbolchi Titsiano De Patre Eldor Shomurodov “Kalyari”ni kuchaytira olishiga ishonmoqda.

- Men hozir “Sassuolo”da skautlik ishini olib boryapman va mehnat faoliyatimdan kelib chiqib shuni aytamanki, ayni paytda gol urish juda qiyin boʻlgan Italiya chempionatiga mos tushadigan yaxshi saviyadagi hujumchini topish oʻta mushkul vazifa.

Bu borada Eldor Shomurodov A Seriyana yaxshi bilishini ta'kidlash lozim. Qolaversa, u oʻtgan mavsum Sardiniyada toʻp tepdi. U bosh murabbiy Davide Nikola jamoasini sezilarli darajada kuchaytirishga qodir.

Toʻgʻri Lapadula va Pavoletti zoʻr oʻyinchilar, lekin ular yoshi oʻtib borayotgani uchun har doim ham jismoniy tayyorligini barqaror ushlay olmayapti, - dedi Titsiano De Patre.

Rim klubi sport direktori Florian Gisolfi Eldor Shomurodov masalasida “Kalyari” va “Empoli”ning “Roma” xoʻjayinlariga ma'qul keladigan yakuniy takliflarini kutishga qaror qilgan.

La Gazzetta dello Sport nashriga koʻra, “Roma” bosh murabbiy Klaudio Raneriga yangi markaziy hujumchi olib bermoqchi. Biroq bu transfer Eldor Shomurodovga munosib xaridor chiqqanidan keyin amalga oshiriladi.

Soʻnggi ma'lumotlarga qaraganda, poytaxt klubi Fransiya chempionatida “Renn” sharafini himoya qilayotgan 22 yoshli markaziy hujumchi Arno Kalimuendoni olishni moʻljallayapti.

Lekin frantsiyaliklar oʻz hujumchisi uchun 20 million yevro talab qilayotgani “Roma” mutasaddilarini qoniqtirayotgani yoʻq.

Yuqoridagi ma'lumotlardan ma'lum boʻladiki, Eldor Shomurodov faoliyatini qaysi klubda davom ettirishi va transfer qachon amalga oshirilishi hali aniqmas. Legionerimiz mavsumni “Roma”da yakunlab qoʻyishi ham ehtimoldan xoli emas... “Zamin” yangiliklarini “Telegram”da kuzatib boring