Abduqodir Husanov qachon “Manchester Siti” futbolchisi sifatida tanishtiriladi?

Ma'lumki, taniqli insayder Fabritsio Romano “Lans” klubida toʻp surayotgan oʻzbekistonlik futbolchi Abduqodir Husanovning “Manchester Siti”ga oʻtishi boʻyicha barcha kelishuvlar yakunlanganini ma'lum qildi. Romano transfer qiymati 40 million yevroni tashkil etishi va qoʻshimcha ravishda 10 million yevro bonus koʻzda tutilganini ta'kidladi.

Shundan soʻng muxlislar ushbu transferning rasman e'lon qilinishi kutishni boshladi. Bundan tashqari, Romano 48 soat ichida barchasi hal boʻlishi haqida ma'lumot bergan edi.

Biroq koʻpchilikka qiziq, nega 48 soatdan ham koʻproq vaqt oʻtgan boʻlsa-da, transfer hali e'lon qilinmadi?

Buning asosiy sababi — viza masalasi. Ma'lumki, Buyuk Britaniyaning Evropadan ajralishi ortidan mamlakatga kirish va ishlash vizasi olish jarayoni sezilarli darajada murakkablashgan. Abduqodir Husanov ham Britaniyaning ishchi vizasini olishi shart va bu jarayon ma'lum vaqtni talab qilayotgan boʻlishi mumkin.

Taxminlarga koʻra, ushbu masala yaqin kunlarda toʻliq hal etiladi. Shundan soʻng, terma jamoamiz a'zosi sifatida Abduqodir Husanov “Manchester Siti” futbolchisi sifatida rasman tanishtirilishi kutilmoqda.

Shunday ekan, turli shubhali gaplar yoki qoʻshimcha taxminlardan hozircha tiyilish maqsadga muvofiq. Hammasi yaqin orada aniq boʻladi. “Zamin” yangiliklarini “Telegram”da kuzatib boring