Oʻzbekiston ayollar milliy terma jamoasiga xorijlik bosh murabbiyi tayinlandi!

Xabaringiz bor, 2029 yilda ayollar futboli boʻyicha qit'aning eng nufuzli turniri — ayollar Osiyo kubogiga mamlakatimiz mezbonlik qiladi.

Ushbu musobaqaga munosib hozirlik koʻrish va 2026-yilgi Osiyo kubogida Oʻzbekiston ayollar milliy terma jamoasining ishtirokini ta'minlash maqsadida amaliy ishlar davom etmoqda.

Oʻzbekiston futbol assotsiatsiyasi rahbariyati Oʻzbekiston ayollar milliy terma jamoasi bosh murabbiyligiga nomzod Kotrina Kulbite bilan uchrashdi. Dastlab, litvalik mutaxassis mamlakatimiz futboli tarixi va qoʻlga kiritilgan yutuqlar bilan tanishtirildi. Shuningdek, bugungi kunda yurtimizda ayollar sporti, xususan, futbolga berilayotgan e'tibor haqida ma'lumot berildi.

OʻFA rahbariyati ayollar futboli kun sayin rivojlanayotgani va futbol bilan shugʻullanayotgan qizlar soni ortib borayotganini e'tirof etib, mamlakatimiz mezbonlik qiladigan 2029 yilgi ayollar Osiyo kubogida munosib ishtirok etish, Jahon chempionati va Olimpiya oʻyinlariga yoʻllanma olish asosiy maqsadlarimiz ekani, shuningdek, joriy yilning iyun oyida oʻtkaziladigan 2026-yilgi ayollar Osiyo kubogi saralash bosqichida yuqori natija koʻrsatib, qit'a turniriga yoʻllanma olishimiz zarurligini ta'kidladi.

Oʻz navbatida Kotrina Kulbite ulkan tarix va katta potentsialga ega jamoa bosh murabbiyi etib tayinlanayotganidan mamnun ekani va Oʻzbekistonda ayollar futboli yanada rivojlanishida bor kuch-gʻayratini ishga solishga tayyorligini bildirdi.

Shundan soʻng, UEFAning “Pro” litsenziyasiga ega boʻlgan Kotrina Kulbite bilan shartnoma masalasida dastlabki muzokaralar olib borildi. Litvalik mutaxassisning vazifalari muhokama qilindi va kelgusidagi rejalar xususida fikr almashildi.

Ma'lumot oʻrnida, Kotrina Kulbite UEFAning murabbiylarni oʻqitish boʻyicha instruktori hisoblanadi. Litva ayollar terma jamoasi va turli yosh toifalaridagi qizlar terma jamoalarida bosh murabbiy va yordamchi murabbiy lavozimlarida faoliyat yuritgan. “Zamin” yangiliklarini “Telegram”da kuzatib boring