Jerar Pike futbol qoidalarini o‘zgartirishni taklif qilmoqda: 0:0 uchun ochko bo‘lmasin!

Futbol olamida yangiliklar va takliflar ko‘p, ammo ayrimlarining ta’siri juda katta bo‘lishi mumkin. "Barselona" klubining afsonaviy sobiq himoyachisi Jerar Pike futbolga tubdan o‘zgarish kiritishni taklif qilmoqda. Unga ko‘ra, jamoalarni hujumkor o‘yin ko‘rsatishga majburlash uchun 0:0 hisobidagi durang uchun hech qanday ochko berilmasligi kerak.

Pike: "Tomoshabinlar 0:0 hisobini ko‘rmasligi kerak"

Futbolning tomoshabopligi borasida o‘z qarashlariga ega bo‘lgan Pike yaqinda Iker Kasilyas bilan podkast suhbati davomida jamoalarni rag‘batlantirish uchun yangi qoidalarni joriy qilishni taklif qildi.

— 100, 200 yoki 300 yevro sarflab stadionga kelgan muxlis 0:0 hisobini ko‘rmasligi kerak. Nimadir o‘zgartirish zarur. Masalan, agar o‘yin 0:0 hisobida tugasa, jamoalar hech qanday ochko olmasin. Tasavvur qiling, 70-daqiqadan keyin qanday o‘yin boshlanadi! — dedi Pike.

Bu g‘oya, shubhasiz, hujumkor futbolni rivojlantirishga yordam berishi mumkin. Jamoalar hisobni ochishga harakat qiladi, himoyaviy o‘yindan voz kechadi va bu futbolni yanada qiziqarli qiladi.

Durangni yo‘q qilish g‘oyasi

Ayni paytda, durang jamoalarga bir ochko berilishi orqali jamoalar xavfsiz taktika qo‘llaydi. Biroq, Pikening fikricha, buning o‘rniga futbol basketbol yoki tennisdagi kabi hal qiluvchi natijalarga ega bo‘lishi kerak.

Taxminan bir yil oldin u durang natijalarini butunlay yo‘q qilish taklifini ilgari surgan edi. Bu g‘oya muxlislar orasida turlicha bahs-munozaralarga sabab bo‘ldi.

Pike g‘oyasi ish berishi mumkinmi?

Futboldagi katta musobaqalarda bu kabi qoidalar joriy qilinsa, o‘yinlar yanada qiziqarli tus olishi mumkin. Ayniqsa, chempionat so‘nggi turlarida jamoalar to‘liq hujumkorlikka o‘tib, muxlislarga unutilmas damlar ulashishi ehtimoldan holi emas.

Shu bilan birga, bu taklif barcha jamoalarga to‘g‘ri kelavermaydi. Masalan, kuchsiz jamoalar katta raqiblarga qarshi mudofaa taktikasini qo‘llab, hech bo‘lmasa bir ochko olish imkoniyatidan mahrum bo‘ladi.

Lekin bir narsa aniq: Pikening g‘oyasi futbol olamida qizg‘in muhokama qilinadi va futbolni yanada dinamik va hujumkor qilish yo‘lida yangi fikrlarga yo‘l ochishi mumkin.

Sizningcha, 0:0 uchun ochko bekor qilinishi kerakmi? Bu futbolni tomoshabop qiladimi? “Zamin” yangiliklarini “Telegram”da kuzatib boring