“Tottenxem” Abduqodir Husanovga qarshi o‘n daqiqa o‘ynagan yulduzdan voz kechdi

“Tottenxem” klubi 28 yoshli nemis hujumchisi Timo Verner bilan uzoq muddatli shartnoma imzolamaslikka qaror qildi. Jamoa rahbariyati tajribali futbolchini sotib olish imkoniyatiga ega edi, ammo bu variantdan foydalanmadi. Endi Verner mavsum yakunlanganidan so‘ng “RB Leypsig”ga qaytib boradi.

Nega “Tottenxem” Vernerdan voz kechdi?

Verner 2024 yilning qishida “Tottenxem” safiga yarim mavsumlik ijara asosida qo‘shilgan edi. Keyinchalik bu muddat yana bir yilga uzaytirilishi mumkinligi aytilgan, ammo hujumchining o‘yini klubning katta ishonchini qozona olmadi.

Nemis forvardi “Tottenxem” safida 27 ta o‘yin o‘tkazib, atigi bitta gol urdi. Bu esa hujumchi uchun juda nochor natija hisoblanadi. Eng muhimi, Timo Verner jiddiy o‘yinlarda o‘zini ko‘rsata olmadi. Xususan, “Manchester Siti”ga qarshi uchrashuvda u so‘nggi daqiqalarda maydonga tushgan va Abduqodir Husanov yetakchiligidagi himoya chizig‘ini yorib o‘ta olmagan edi.

Jamoa bosh murabbiyi Ange Postekoglu Vernerning o‘yinidan qoniqmagan holda uni tanqid qilishdan to‘xtamadi va futbolchiga ishonch bildirishni bas qildi. Shu sababli “Tottenxem” Vernerni 8,5 million funt evaziga sotib olish imkoniyatidan voz kechdi.

Verner qayerga ketadi?

“RB Leypsig” esa, Vernerni jamoada olib qolish niyatida emas. Klub futbolchining faoliyati pasayib ketayotganini inobatga olgan holda, uni to‘liq sotishni rejalashtirmoqda.

So‘nggi ma’lumotlarga ko‘ra, Vernerning keyingi manzili AQSH bo‘lishi mumkin. Germaniyalik hujumchiga “Nyu-York Red Bullz” jamoasidan taklif bor va katta ehtimol bilan yozda u ushbu klub safiga o‘tadi.

Timo Verner Yevropa futbolida o‘zini ko‘rsatish uchun yana bir imkoniyatga ega bo‘ladimi yoki u endi faoliyatini AQSHda davom ettiradi – bu savol hali ochiq qolmoqda. Ammo “Tottenxem” uchun u ishonchni oqlay olmagan futbolchi sifatida tarixda qoldi. “Zamin” yangiliklarini “Telegram”da kuzatib boring