Gvardiola Kevin de Bryuyne bilan xayrlashish qarori haqida: u nimalarni oshkor qildi?

“Manchester Siti”da yangi davr boshlanishi mumkin. Jamoaning eng muhim figuralaridan biri, belgiyalik yulduz Kevin de Bryuyne klubni tark etishi kutilmoqda. Unga nisbatan qabul qilingan bu qaror muxlislar orasida turli fikrlarga sabab bo‘ldi. Ammo klub bosh murabbiyi Xosep Gvardiola bu borada ochiq-oydin izoh berdi.

Gvardiola o‘z so‘zlarida De Bryuyne bilan xayrlashish qarori shaxsiy emas, balki klub darajasidagi qaror ekanini ta’kidladi:

– Qaror klub tomonidan qabul qilindi. Klub nima bo‘lganda ham klub. Qaror menga, Chiki Begisristayn va klubga tegishli. Hamma gap shunda. Klub oldinga qarab harakat qilishi kerak, – dedi ispaniyalik mutaxassis.

Uning ta’kidlashicha, bunday qaror osonlikcha qabul qilinmaydi, ammo futbolda har bir davr o‘z nihoyasiga yetadi.

– Erishilgan ko‘rsatkichlarni takrorlash qiyin bo‘ladi, lekin biz boshqa sifatlarni ham topishimiz lozim. Jamoa mavsumni qanday yakunlashiga qaraymiz. Kevin shartnomasi tugayotgan yagona futbolchi. Qolganlarning bitimi amalda. Ular bilan nima qilishni hali o‘ylab ko‘rganimiz yo‘q.

Muhabbat va ehtirom bilan

Gvardiola, shuningdek, De Bryuynega bo‘lgan samimiy ehtiromini yashirmadi. Unga ko‘ra, bu futbolchi “Siti” uchun faqat bir o‘yinchi emas – balki tarixga kirgan afsona!

– Klub Kevin de Bryuynega hamma narsani berdi, u ham jamoaga borini bag‘ishladi. Bu yerda o‘tkazilgan yillarni xotirlash yoqimli tuyg‘ularni beradi va buni unutib bo‘lmaydi, – dedi “shaharliklar” ustozi.

Kevin de Bryuyne – afsonaviy yo‘l

Eslatib o‘tamiz, Kevin de Bryuyne “Manchester Siti”ga 2015 yili “Volfsburg”dan 76 million yevroga ko‘chib o‘tgandi. U vaqt mobaynida jamoa bilan 18 ta sovrinni qo‘lga kiritdi, jumladan, 5 marta Angliya chempionligini, Chempionlar ligasini, Kubok va Liga kuboklarini yutib oldi.

Faqat statistika emas — De Bryuyne o‘zining o‘yin tashkil etish mahorati, aniq paslari, mukammal strategiyasi va liderlik qobiliyati bilan “Siti”ni yangi bosqichga olib chiqdi.

“Siti”da davr yakunlanmoqda, yangi davr esa boshlanish arafasida

De Bryuynesiz “Siti” qanday ko‘rinish oladi? Bunga vaqt javob beradi. Bir narsa aniq: Kevin de Bryuyne “Manchester Siti” tarixida o‘chmas iz qoldirdi va unga bo‘lgan ehtirom har doim saqlanib qoladi.

Muxlislar, Siz bu qaror haqida nima deb o‘ylaysiz? De Bryuynesiz jamoa qanchalik kuchli bo‘la oladi? “Zamin” yangiliklarini “Telegram”da kuzatib boring