Eldor Shomurodov "Roma" qahramoniga aylandi!

O‘zbekiston milliy terma jamoasining yetakchi hujumchisi Eldor Shomurodov Italiya chempionati doirasida "Verona" klubiga qarshi bahsda "Roma"ning asosiy qahramoniga aylandi. Ayni o‘yinda u yagona golni urib, jamoasiga muhim g‘alabani taqdim etdi.

Shomurodovning goli "Roma" uchun nafaqat uch ochko, balki Chempionlar ligasi yo‘llanmasiga erishish yo‘lidagi muhim qadam ham bo‘ldi. Ushbu muvaffaqiyatdan keyin rimlik muxlislar o‘zbek hujumchisining nomini quvonch bilan tilga olib, ijtimoiy tarmoqlarda uni qo‘llab-quvvatlashmoqda.

O‘yindan so‘ng Eldor muxlislarning katta roliga alohida e’tibor qaratdi:

"Biz Chempionlar ligasiga chiqishni juda xohlaymiz. Bunga erishish uchun har bir o‘yinda g‘alaba qozonishimiz zarur. Murabbiyimiz bu bahs oson bo‘lmasligini aytgan edi, lekin biz uddaladik. Ayniqsa muxlislarga rahmat, ular stadionda ajoyib muhit yaratishdi va bu bizga juda katta kuch berdi", — dedi Shomurodov.

Eslatib o‘tamiz, bu mavsumda 29 yoshli o‘zbek forvardi "Roma" tarkibida 32 ta o‘yinda maydonga tushib, jamoasi uchun 7 ta gol va 2 ta golli uzatmani amalga oshirgan.

Shomurodovning muhim gollari Italiyadagi muxlislar orasida ham uning obro‘sini tobora oshirib, o‘ziga xos hurmat qozonishiga xizmat qilmoqda. O‘zbek muxlislari esa o‘z navbatida Eldordan yangi g‘alabalar va chempionliklar kutmoqda. “Zamin”ni Telegramʻda oʻqing!