“Qizilqum” ustozi “Navbahor” taslim etilgan muhim o‘yin haqida nimalar dedi?

Superliganing 8-turidan o‘rin olgan “Qizilqum” – “Navbahor” (3:2) uchrashuvi nafaqat bahsning shiddati, balki jamoalarning qaytish qobiliyati va maydondagi istaklari bilan muxlislar xotirasida qoldi. Bellashuv yakunida mahalliy jamoa – “Qizilqum” qiyin, ammo juda muhim g‘alabaga erishdi.

Bahsdan so‘ng, navoiyliklar bosh murabbiyi Nikola Lazarevich matbuot anjumanida ishtirok etib, nafaqat o‘yin tahlilini, balki jamoa kayfiyati va ayrim futbolchilarning holati haqida ham ochiqcha gapirdi.

“Bu g‘alabani xalqimizga bag‘ishlaymiz – bugun tarixiy kun”

“Eng avvalo, bu g‘alabani Navoiy ahliga bag‘ishlashni istayman. Ular shu paytgacha 2 yil davomida o‘z jamoasini o‘z uyida ko‘rishni kutdi. Nihoyat, bugun stadionda to‘p tepdik va muxlislarni xursand qilishga muvaffaq bo‘ldik, deb o‘ylayman.

Bu yutuqni jamoaning barcha a’zosi, shuningdek, klub rahbariyati va futbol fedaratsiyasiga bag‘ishlayman. Ular bizga doimiy qo‘llab-quvvatlov ko‘rsatishmoqda.

"Nasaf"dan ko‘rilgan 0:4 hisobidagi alamli mag‘lubiyatdan so‘ng, futbolchilar bilan ochiq suhbat o‘tkazdik va keyingi o‘yinda bunga javob qaytarishga tayyorgarlik ko‘rdik. Xudoga shukr, natija o‘zini ko‘rsatdi.”

“Navbahorga qarshi o‘yin – to‘liq 50ga 50 bo‘ldi”

“Biz “Navbahor”ning kuchli jamoa ekanini bilardik. Ular to‘pni nazorat qiladi, hujumlarni tashkil qiladi va mahoratli o‘yinchilarga ega. Shu bois, biz ushbu raqibga jiddiy tayyorgarlik ko‘rdik.

Bu o‘yinni oldindan taxmin qilish qiyin edi. Deyarli 50ga 50 o‘tdi. Omad biz tomonda bo‘ldi. Muhimi, jamoamiz g‘alaba uchun oxirigacha kurashdi.”

“Paparigada kichik pasayish bor, ammo u ishdan to‘xtagani yo‘q”

“Papariga mavsumni juda yaxshi boshladi. Belorussiyaning "Naftan" klubida yorqin o‘yinlar namoyish etgan va bizga ishtiyoq bilan qo‘shilgan.

Albatta, har bir futbolchida turli davr bo‘ladi – ba’zi vaqtlarda formaning pasayishi kuzatiladi. Paparigada shunday palla bo‘lyapti, deb hisoblayman.

Lekin shunisi borki, u mashg‘ulotlarda har doim bor kuchi bilan ishlamoqda. Bu bizni xursand qiladi. Biz unga ishonamiz va u qayta o‘z yuqori formasiga qaytishiga ishonchimiz komil.”

“Rahmatullayev shifokorlar tavsiyasiga ko‘ra qaydnomadan chiqarilgan”

“Shahzod Rahmatullayev bugun qaydnomada yo‘q edi. Bunga sabab – o‘tgan o‘yinda olgan jarohati. Shifokorlar tavsiyasi asosida unga biroz dam berishga qaror qilindi.

U shifo topgandan so‘ng asta-sekin tiklanish jarayonini boshlaydi va jamoaga qayta qo‘shiladi. U jamoamizning muhim bo‘lagidir va tez orada safga qaytishi kutilayapti.”

Xulosa o‘rnida...

“Qizilqum” so‘nggi yillarda o‘z maydonida bunday muhim g‘alabani kam ko‘rgandi. Lazarevich shogirdlari bugungi bahsda har jihatdan o‘zini to‘liq namoyon qildi. Jamoa nafaqat natija uchun, balki muxlislar uchun ham o‘ynayotganini ko‘rsatdi.

Futboldagi himmat, barqarorlik va ishonch — bugun “Qizilqum”da edi. Endi navbatdagi turlarda shu ruhni saqlab qolish jamoaning asosiy vazifasiga aylanadi.

Siz nima deb o‘ylaysiz — “Qizilqum” bu mavsumda o‘rtajamoq jamoa emas, balki jiddiy raqibga aylanishi mumkinmi? “Zamin”ni Telegramʻda oʻqing!