Sobiq FIFA hakami: «Inter» va «Barselona» bahsida penalti aniq belgilanmadi

Yevropa Chempionlar Ligasi chorak final javob uchrashuvi doirasida Milanning «Inter» va Kataloniyaning «Barselona» jamoalari o‘rtasida bo‘lib o‘tgan qizg‘in bahs haligacha keng muhokamalarga sabab bo‘lmoqda. O‘yinda yuzaga kelgan bahsli vaziyat esa mutaxassislar o‘rtasida qizg‘in munozaralar uyg‘otdi.

O‘yinning hal qiluvchi pallasida kataloniyaliklar futbolchisi Lamin Yamal milanliklar yarim himoyachisi Genrix Mxitaryan tomonidan qo‘pollik bilan to‘xtatildi. Bosh hakam Shimon Marchinyak dastlab jarima maydoni ichida qoidabuzarlik yuz berganini belgilab, «Barselona» foydasiga penalti tayinladi. Biroq VAR orqali vaziyatni yana bir bor ko‘rib chiqqan hakam qarorini o‘zgartirdi va holat jarima maydonchasidan tashqarida sodir bo‘lgan deb, penaltini bekor qildi.

Bu qaror sobiq FIFA hakami va mashhur ispaniyalik hakam Mateo Lahos tomonidan jiddiy tanqidga uchradi. Give Me Sport nashriga bergan intervyusida Lahos vaziyatda aniq penalti bo‘lganini ta’kidlab o‘tdi:

«Men vaziyatni yana bir bor diqqat bilan ko‘rib chiqdim va aytmoqchimanki, bu qaror mutlaqo noto‘g‘ri. Ha, albatta, qoidabuzarlik tashqarida boshlangan, lekin Lamin Yamalga nisbatan qo‘pollik va aniq to‘siq jarima maydoni ichida ham davom etgan. VAR nega buni ko‘rib chiqib, aniqlashtirmaganini tushunish qiyin», — deya o‘z e’tirozini bildirdi sobiq hakam.

Lahosning fikricha, Shimon Marchinyak bunday muhim o‘yinda bu kabi jiddiy xatoga yo‘l qo‘ymasligi kerak edi. Ayniqsa, VAR kabi zamonaviy texnologiyalar ishlatilishi mumkin bo‘lgan sharoitda bunday vaziyatlarda ko‘proq e’tibor va ehtiyotkorlik talab etiladi.

Eslatib o‘tamiz, mazkur uchrashuv «Inter»ning 4:3 hisobidagi g‘alabasi bilan yakunlanib, ikki o‘yin natijalari bo‘yicha (7:6) milanliklar Chempionlar Ligasi finaliga yo‘l olgan edi. Lekin bu bahsli vaziyat «Barselona»ning finalga chiqishi uchun hal qiluvchi ahamiyat kasb etishi mumkin edi.

«Barselona» muxlislari va jamoa rahbariyati ham ushbu vaziyat bo‘yicha jiddiy e’tiroz bildirib, hakamlik bo‘yicha savollar tug‘ilganini ta’kidlashgan. Sobiq hakam Lahosning bu bayonoti esa vaziyat atrofidagi muhokamalarni yanada avj oldirishi aniq.

Futbol dunyosida hakamlik bo‘yicha bahslar hech qachon tugamaydigan mavzu bo‘lib qoladi. «Barselona» va «Inter» o‘rtasidagi bu bahsli holat esa Chempionlar Ligasining bu yilgi mavsumidagi eng ko‘p muhokama qilinadigan mavzulardan biri bo‘lib qolishi shubhasiz.

Zamin.uz bilan birga bo‘ling va futbol olamidagi eng muhim va qiziqarli yangiliklarni kuzatib boring! “Zamin”ni Telegramʻda oʻqing!