Lazarevich: “Paxtakor”ga qarshi kutilgan ssenariy yuz berdi

Superliganing 10-turidan o‘rin olgan “Qizilqum” – “Paxtakor” bahsi (0:3)dan so‘ng, navoiyliklar bosh murabbiyi Nikola Lazarevich bellashuv yuzasidan o‘z taassurotlarini bayon etdi.

– Avvalo “Paxtakor” jamoasini haqli g‘alaba bilan tabriklayman. Biz juda yaxshi bilardikki, ular hozir yuqori ruhda harakat qilyapti. Murabbiy o‘zgargach, jamoa hujumkor uslubda o‘ynab, so‘nggi ikki o‘yinda 12 ta to‘p kiritgan. Shuning uchun “sherlar”ning aktiv futbol namoyish etishini kutgandik, – dedi Lazarevich.

Uning so‘zlariga ko‘ra, “Qizilqum” murabbiylar shtabi raqibga qarshi taktik “syurpriz” tayyorlagan va birinchi bo‘limda bu reja samara bergan. Jamoa bir qator xavfli vaziyatlar yaratgan, ammo ularni golga aylantira olmagan. Ikkinchi taymda esa “Paxtakor” imkoniyatlaridan oqilona foydalanib, hisobni yirik ko‘rinishga keltirgan.

Jumanqo‘ziyev nega zaxiraga olindi?

– U yaxshi o‘ynayotgandi. Biroq unda sariq kartochka bor edi, undan keyin yana ikki vaziyatda xatoga yo‘l qo‘ydi. Hakam tomonidan ogohlantirilgandan keyin u maydondan chetlatilishi mumkin edi. Shuning uchun ehtiyot chorasi sifatida uni almashtirdik, – dedi Lazarevich.

Vahobov va Diyor nega o‘yinda qatnashmadi?

Bosh murabbiyga ko‘ra, Vahobov avvalgi turda jarohat olgan, ammo u kelasi uchrashuvgacha safga qaytishi mumkin. Diyor Rahmatilloyev esa kechagi mashg‘ulotda jiddiy jarohat olgan va yaqin vaqtlarda jamoaga yordam bera olmaydi.

Zamin.uz tahririyati “Qizilqum” jamoasidagi jarayonlarni kuzatishda davom etadi. Siz klubning keyingi o‘yinlaridan qanday natijalar kutyapsiz? “Zamin”ni Telegramʻda oʻqing!