Messi AQSHda ham to‘xtamaydi: "Inter Mayami" raqibini "yakson qildi"!

Bugun AQSHning Major Liga Sokker chempionati doirasida bo‘lib o‘tgan bahsda «Inter Mayami» o‘z maydonida «Kolambus Kryu» klubini qabul qildi va raqibini 5:1 hisobida taslim qildi. Bu uchrashuv to‘liq Lionel Messining individual shouiga aylanib ketdi va argentina yulduzi yana bir bor o‘zining yuqori darajadagi futbolchi ekanligini ko‘rsatib berdi.

Mayami shahrining DRV PNK Stadium arenasiga tashrif buyurgan 18 ming muxlis, Lionel Messi va uning jamoadoshlarining ajoyib o‘yinidan bahramand bo‘ldi. Uchrashuvning boshidayoq "Inter Mayami" futbolchilari yuqori pressing va tezkor hujumlar bilan raqibini noqulay vaziyatga soldi.

O‘yinning 13-daqiqasida Tadeo Alende hisobni ochib, mezbonlarni oldinga olib chiqdi. Bu goldan keyin maydondagi asosiy qahramon — Lionel Messi o‘zining yuksak mahoratlarini namoyish qilishni boshladi. 15-daqiqada Messi chiroyli gol bilan hisobni 2:0 ga yetkazdi va bu bilan to‘xtab qolmadi.

24-daqiqada esa Messi yana bir bor o‘z mahoratlarini namoyish qilib, o‘yindagi ikkinchi golini kiritdi va hisobni 3:0 ga yetkazdi. Shu tariqa birinchi taym to‘liq «Inter Mayami» ustunligida o‘tdi.

Ikkinchi taymda «Kolambus Kryu» o‘yinni biroz tenglashtirishga harakat qildi va 58-daqiqada Kristian Ruvalkaba tomonidan hisobni qisqartirishga erishdi. Ammo bu mehmonlarning umidlarini qaytarish uchun yetarli bo‘lmadi.

64-daqiqada Messining aniq pasidan keyin maydonga tushgan urugvaylik yulduz Luis Suares gol urib, hisobni 4:1 ga olib chiqdi. Messining ajoyib assistlari esa shu bilan cheklanib qolmadi.

O‘yinning yakuniga yaqin, 89-daqiqada Messi yana bir ajoyib uzatma bilan Fafa Pikoultga yordam berdi va o‘yinning yakunlovchi hisobini belgiladi – 5:1.

Bu o‘yinning eng katta qahramoni, shubhasiz, Lionel Messi bo‘ldi. U maydonda ikki gol va ikki assist bilan «Inter Mayami»ning ishonchli g‘alabasiga asosiy hissani qo‘shdi. Bu o‘yin yana bir bor Messining hali ham yuqori saviyada ekanligini va jamoasiga har qanday vaqtda yordam berishi mumkinligini ko‘rsatdi.

Uchrashuv yakunlangach, stadionga tashrif buyurgan muxlislar Lionel Messining nomini baland ovozda hayqirib, uning ajoyib o‘yinini qadrlashdi. Bu kecha haqiqatan ham Messining benefisi bo‘lib, uning muxlislari uchun yana bir yorqin xotira sifatida tarixga muhrlanadi.

Shunday qilib, "Inter Mayami" chempionatda yana bir ishonchli va katta g‘alaba bilan yuqori pog‘onalarga ko‘tarilishda davom etmoqda. Messining qahramonliklari esa jamoaning sovrinlar uchun kurashida asosiy omil bo‘lib qolishi shubhasiz! “Zamin”ni Telegramʻda oʻqing!