Qatar yulduzi: O‘zbekistonga qarshi o‘yindan yangi sahifa boshlaymiz

Jahon chempionatiga saralashning 3-bosqichi arafasida Qatar terma jamoasi hujumchisi Almoyez Ali muhim uchrashuv — O‘zbekistonga qarshi o‘yin oldidan o‘z fikrlari bilan o‘rtoqlashdi.

28 yoshli tojik etnik kelib chiqishga ega bo‘lgan Qatar futbolchisi jamoasining saralash bosqichidagi muvaffaqiyat va qiyinchiliklarini ochiq-oydin ifodaladi:

“O‘zbekistonga qarshi juda jiddiy o‘yinga tayyorgarlik boshlab yuborildi. Jamoamiz bu bosqichda turli qiyinchiliklarga duch keldi. Ayniqsa, o‘z maydonimizda juda yaxshi o‘yinlar ko‘rsatdik. Ammo safardagi uchrashuvlarda ba’zi natijalar biz istagancha kechmadi. Mahalliy stadionda g‘alaba qozonish kerakligini ham, safarda esa kamida ijobiy natija qayd etish muhimligini yaxshi bilamiz,” — dedi u intervyusida.

Almoyez Ali muxlislarga ham murojaat qilib, jamoaning keyingi o‘yinlarda yanada kuchli va shay holda harakat qilishini va’da qildi:

“Biz muxlislarimizni xursand qilish uchun bor kuchimiz bilan harakat qilamiz. O‘zbekistonga qarshi uchrashuvdan boshlab, har bir vazifani jiddiylik bilan bajaramiz. Bu o‘yin biz uchun yangi bosqichga tayyorgarlikni boshlash nuqtasi bo‘ladi,” — deb qo‘shimcha qildi taniqli hujumchi.

Eslatib o‘tamiz, jahon chempionati 3-saralash bosqichining 10-turidan o‘rin olgan O‘zbekiston – Qatar bellashuvi 10 iyun kuni Toshkentdagi “Bunyodkor” stadionida bo‘lib o‘tadi.

Ushbu o‘yin natijasi Qatar uchun muhim ahamiyatga ega, chunki ular pley-off bosqichiga yo‘l olish uchun kurashni davom ettirmoqda. O‘zbekiston terma jamoasi esa jahon chempionati yo‘llanmasini allaqachon qo‘lga kiritgan.

Bellashuv muxlislar va mutaxassislar nazarini o‘ziga jalb qilgan, chunki har ikki jamoa o‘yin orqali o‘z salohiyatini yana bir bor namoyon etishni maqsad qilmoqda. Qatar jamoasi esa aynan Toshkentdagi o‘yindan keyin keyingi bosqichga yangi ruhda qadam qo‘yishga umid qilmoqda. “Zamin”ni Telegramʻda oʻqing!