“Bunyodkor”da katta o‘zgarishlar: mag‘lubiyatdan so‘ng murabbiy ham ketadimi?

Jahon futbolidagi tantanalar Shimoliy Amerikadagi mundialga tayyorgarlik bilan davom etayotgan bir paytda, o‘zbek futbolida ham jiddiy silkinishlar kuzatilmoqda. FIFA kunlari munosabati bilan yurtimizda Superliga bahslariga qisqa tanaffus berildi. Ammo aynan shu tanaffus davomida “Bunyodkor” klubida kutilmagan o‘zgarishlar yuz bera boshladi.

Klubdagi ilk muhim yangilik sifatida sport direktori Islom Inomovning iste’fosi qayd etildi. Mazkur qaror ichki muhokamalardan so‘ng qabul qilingani aytilmoqda. Shu bilan birga, jamoaning bosh murabbiyi Ilyos Zeytullayevga ham yaqin orada xayrlashish eshiklari ko‘rsatilishi ehtimoldan xoli emas.

Ishonchli manbalarga ko‘ra, agar “Bunyodkor” navbatdagi turdagi “Paxtakor”ga qarshi o‘yinda mag‘lub bo‘lsa, Zeytullayev bilan rasman xayrlashiladi. Bu o‘yin jamoa murabbiylari uchun sinov maydoniga aylanishi mumkin.

Boshqaruv darajasidagi bu o‘zgarishlar bilan birga, yangi nomzodlar ham muhokama qilinmoqda. Xususan, klub bosh direktori lavozimiga akademiyada faoliyat yuritib kelayotgan va bir paytlar “Metallurg” klubida uzoq yillar ishlagan Shavkat Saidov ko‘zlanmoqda. Sport direktori sifatida esa Roman Chernikovning tayinlanishi kutilmoqda. Jamoa bosh murabbiyi kim bo‘lishi hozircha sir saqlanmoqda, ammo bu lavozim uchun bir necha nomzodlar muhokama qilinmoqda.

E’tiborlisi, Inomov va Zeytullayev tandemining o‘tgan yilgi faoliyati juda yuqori baholangan edi. “Bunyodkor” og‘ir holatda qolganiga qaramay, Superligada o‘z o‘rnini saqlab qolishga muvaffaq bo‘lgan. Shuningdek, jamoaning ko‘rsatayotgan o‘yin uslubi futbol ishqibozlari va mutaxassislar tomonidan ijobiy baholangandi.

Joriy mavsumda ham “Bunyodkor” yetarlicha raqobatbardosh o‘yinlar namoyish etmoqda. Jamoa mamlakatimizning yetakchi klublari — “Nasaf”, “Neftchi” va OKMKga qarshi bahslarda ochko qo‘lga kiritishga erishgan. Shuningdek, yosh futbolchilarga imkoniyat berish, taktik yechimlardagi o‘zgarishlar va jamoaviy uyg‘unlik jihatdan olg‘a qadamlar sezilmoqda.

Shu bois, murabbiylar korpusiga nisbatan bunday keskin qarorlar ayrim muxlislar va tahlilchilarda turli fikrlarni keltirib chiqarmoqda. Ko‘pchilik klub rahbariyati avvalgi tajribalardan yetarlicha saboq chiqarmayotganini ta’kidlamoqda.

Har holda, “Paxtakor”ga qarshi bugungi uchrashuv nafaqat ochko uchun kurash, balki “Bunyodkor” murabbiylar shtabi taqdiri uchun ham hal qiluvchi ahamiyat kasb etadi. “Zamin”ni Telegramʻda oʻqing!