Gvardiola: "Yuventus" – Italiyadagi eng ta’sirli klub!

"Manchester Siti" bosh murabbiyi Xosep Gvardiola Klublar o‘rtasidagi Jahon chempionatida "Yuventus"ga qarshi bo‘lib o‘tadigan muhim to‘qnashuv oldidan o‘z fikrlarini bayon qildi. U raqib jamoani yuqori baholar ekan, turinliklar bilan bo‘ladigan o‘yinni juda intiqlik bilan kutayotganini ta’kidladi.

"Biz joriy mavsumda "Yuventus" bilan allaqachon o‘yin o‘tkazganmiz va o‘sha safar Turinda mag‘lubiyatga uchraganmiz. Endi esa ularning boshqaruvida yangi murabbiy. Bu jamoa Italiyaning asosiy grand klubi, ehtimol Yevropada emas, ammo Italiyada shubhasiz eng ommaviy va ta’sirli jamoa hisoblanadi", — dedi Gvardiola Mediaset nashriga bergan intervyusida.

Gvardiolaning ta’kidlashicha, guruhdagi birinchi o‘rin taqdiri aynan shu bellashuvda hal bo‘ladi. "Yuventus" nafaqat tarixiy tajribasi, balki hozirgi kundagi shakli va murabbiylik shtabining yangilanishi bilan ham jiddiy raqib hisoblanadi.

"Men shaxsan ularga qarshi yana maydonga tushishni sabrsizlik bilan kutyapman. Bu o‘yin nafaqat natija, balki har ikki jamoa uchun muhim sinov ham bo‘ladi", – dedi ispaniyalik mutaxassis.

Ma’lumot uchun, "Manchester Siti" va "Yuventus" o‘rtasidagi to‘qnashuv 26 iyun kuni Toshkent vaqti bilan soat 00:00 da boshlanadi. Bellashuv Klublar o‘rtasidagi Jahon chempionati guruh bosqichidagi hal qiluvchi bahslardan biri sifatida katta qiziqish uyg‘otmoqda.

"Yuventus" so‘nggi paytlarda shakli yuqori bo‘lgan jamoalardan biri sifatida ko‘rilmoqda. Ularning yangi murabbiyi ostidagi taktik yondashuv va futbolchilarning bir-biriga uyg‘unlashgan harakatlari "Siti"ni jiddiy sinov kutayotganini anglatadi.

Shuningdek, Gvardiolaning fikrlari shundan dalolat beradiki, u bu raqibga hurmat bilan yondoshadi va bellashuvda yengil g‘alabaga umid bog‘lamaydi. Aksincha, jamoasi jismonan ham, ruhiy jihatdan ham ushbu uchrashuvga puxta tayyorgarlik ko‘rishi kerakligini yaxshi anglab turibdi.

O‘yinning ahamiyati shundaki, bu nafaqat Klublar o‘rtasidagi jahon chempionatidagi guruh bosqichi uchun muhim, balki ikki top jamoa va murabbiylar o‘rtasidagi tajriba, strategiya va iroda to‘qnashuvi sifatida ham alohida ahamiyatga ega.

Muxlislar esa butun dunyo bo‘ylab ushbu o‘yinni katta intiqlik bilan kutmoqda. Chunki ikki grand jamoa o‘rtasidagi bellashuv doim esda qoladigan lahzalar, dramatik vaziyatlar va yuqori darajadagi futbol tomoshasini taqdim etishi aniq. “Zamin”ni Telegramʻda oʻqing!