Angliya Chempionshipida o‘ynayotgan “Bristol Siti” futbol klubi kelajakda yangi egasiga ega bo‘lishi mumkin. “The Sun” nashri tarqatgan xabarga ko‘ra, Saudiya Arabistonidagi ko‘ngilochar tadbirlar bo‘yicha Bosh boshqarma rahbari, mashhur biznesmen va sport entuziasti Turki Al ash-Shayx ushbu jamoani sotib olish imkoniyatini sinchiklab o‘rganmoqda.
Ma’lumotlarga ko‘ra, “Bristol”ga hozirda Lensdaunlar oilasi egalik qiladi va ular klubni sotishni rejalashtirmayotganini bildirishgan. Biroq Al ash-Shayx tomonidan taklif etilayotgan moliyaviy shartlar o‘ta manfaatli bo‘lishi mumkin va bu qarorni o‘zgartirishga turtki berishi ehtimoldan xoli emas.
Eslatib o‘tamiz, bu saudiyalik tadbirkorning ilk marotaba Angliya klublariga qiziqishi emas. Avvalroq u “Milluoll” va “Sautgempton” klublari bilan ham aloqa o‘rnatishga urinib ko‘rgandi. Uning futbol sohasiga qiziqishi, ayniqsa, so‘nggi yillarda jahon miqyosidagi sport loyihalarini moliyalashtirayotgani bilan bog‘liq. Turki Al ash-Shayx nafaqat mamlakat ichida, balki xalqaro sport bozorida ham ta’sir doirasini kengaytirmoqda.
“Bristol Siti” o‘tgan mavsumda Chempionship musobaqasini 6-o‘rinda yakunlab, APLga chiqish uchun pley-off o‘yinlariga yo‘l olgandi. Biroq yarim finalda “Sheffild Yunayted” bilan kechgan ikki uchrashuvda 0:6 hisobida mag‘lub bo‘lib, elita liga yo‘li yopildi.
Mavjud vaziyat shuni ko‘rsatmoqdaki, katta sarmoyadorning kelishi klub uchun yangi imkoniyatlar eshigini ochishi mumkin. Kuchli moliyaviy baza va global aloqalar “Bristol Siti”ni nafaqat APL, balki Yevropa miqyosida ham raqobatbardosh klubga aylantirishi ehtimoli yo‘q emas.
Turki Al ash-Shayxning qaroridan keyin “Bristol” futbol dunyosidagi navbatdagi “saudiya loyihasi”ga aylanishi mumkin. Bu esa klubning transfer siyosati, infratuzilmasi va marketing strategiyasida tub o‘zgarishlarga sabab bo‘lishi kutilmoqda. “Zamin”ni Telegramʻda oʻqing!
Ctrl
Enter
Xato topdIngizmi
Iborani ajratib Ctrl+Enter tugmasini bosing Mavzuga oid yangiliklar
