Italiyaning yana bir elit jamoasi “Kremoneze” o‘zbekistonlik taniqli hujumchi Eldor Shomurodovni tarkibiga qo‘shish niyatida. Bu haqda "Roma Press" nashri "Rete Sport"ga tayangan holda xabar berdi. Manbalarning yozishicha, “Roma” klubi bilan rasmiy muzokaralar boshlab yuborilgan.
Ma’lumki, Eldor so‘nggi mavsumni Dovbikning o‘rinbosari sifatida samarali o‘tkazdi va endi katta ehtimol bilan “Roma” bilan xayrlashish arafasida turibdi. Garchi unga chet el jamoalaridan ham turli takliflar tushayotgan bo‘lsa-da, o‘zini Italiya chempionati muhitida ancha qulay his qilgan futbolchi A Seriyada qolishni ma’qul ko‘rmoqda.
Shomurodov avvalroq “Jenoa” va “Kalyari” kabi klublarda ham to‘p tepgan va mahalliy futbol muhitini yaxshi o‘rgangan. Hozirda A Seriyaga qaytgan “Kremoneze” jamoasi tajribali hujumchi qidirmoqda va Eldor ular uchun ideal variant sifatida ko‘rilmoqda.
Futbolchining jismoniy holati, universal o‘yin uslubi va Italiya futbolidagi ko‘p yillik tajribasi “Kremoneze” uchun muhim omil bo‘lmoqda. Shu bois, klub murabbiylar shtabi Shomurodovning transferi ustida jiddiy ish olib bormoqda.
Ma’lumotlarga qaraganda, “Roma” hujumchini taxminan 8 million yevroga baholamoqda. Muzokaralar yaqin kunlarda faollashishi kutilmoqda. Qolaversa, Eldorning o‘zi ham yangi jamoaga o‘tishga ochiq ekani ushbu kelishuvni amalga oshishiga imkon yaratishi mumkin.
Shunday qilib, yurtdoshimizning Italiyadagi faoliyati yangicha bosqichga o‘tayotgan ko‘rinadi. Kelasi kunlar ushbu jarayonda hal qiluvchi ahamiyat kasb etishi tayin. Futbolchilar bozori qizg‘in pallaga kirib bordi va Shomurodovning transferi ham shular qatorida e’tibor markazida bo‘lib turibdi. “Zamin”ni Telegramʻda oʻqing!
Ctrl
Enter
Xato topdIngizmi
Iborani ajratib Ctrl+Enter tugmasini bosing Mavzuga oid yangiliklar
