Yevropa transfer bozorida bu yil ham intrigalar avjida — Fransiya terma jamoasi va “Inter”ning hujumchisi Markus Tyuramning nomi yana shov-shuvlarga sabab bo‘lmoqda. Italyan nashri Il Giorno ma’lumotiga ko‘ra, Tyuramning imkoniyatlaridan Angliya grandi “Arsenal” hamda “Manchester Yunayted” faol ravishda qiziqmoqda. Ikki klub ham yangi markaziy hujumchi izlash jarayonida ushbu nomga alohida e’tibor qaratmoqda.
Shu bilan birga, ilgariroq Markus Tyuram bilan qiziqish bildirgan PSJ klubi ham yozgi transfer oynasida uni o‘z safida ko‘rish niyatida ekani aytilmoqda. Futbolchining “Inter” bilan amaldagi shartnomasida 85 million yevroga teng to‘lov sharti bor va bu summa katta ehtimol bilan klublarning muzokaralar jarayonida asosiy masalaga aylanadi.
Milanliklar esa o‘z navbatida Markus Tyuramning ehtimoliy ketishiga tayyorgarlik ko‘rmoqda. Jurnalistlar ma’lumotlariga ko‘ra, “Inter” jamoasi “Fiorentina”ning snayperi Moyze Kinni ehtimoliy voris sifatida ko‘rib chiqmoqda. Qiziqarlisi, Kin uchun belgilangan 52 million yevrolik voz kechish puli 15 iyulgacha amal qiladi. Agar ushbu sanaga qadar kelishuv amalga oshmasa, “Fiorentina”ni 25 ta gol urgan hujumchini sotishga ko‘ndirish ancha mushkul bo‘ladi.
Shuningdek, insayderlar ma’lumotiga ko‘ra, “Arsenal” va “Manchester Yunayted” Moyze Kin bilan ham aloqada ekani qayd etilgan — bu esa transfer muzokaralarini yanada qizg‘inlashtiradi.
Eslatib o‘tamiz, Markus Tyuram o‘tgan mavsum A Seriyada 32 o‘yinda ishtirok etib, 14 ta gol va 4 ta assist bilan jamoaga katta hissa qo‘shgan. Uni katta klublar o‘ziga og‘dirishi yoki “Inter” safida qolishini vaqt ko‘rsatadi.
Muxlislar esa transfer bozoridagi bu dramaning yakunlarini intiqlik bilan kutmoqda. “Zamin”ni Telegramʻda oʻqing!
Ctrl
Enter
Xato topdIngizmi
Iborani ajratib Ctrl+Enter tugmasini bosing Mavzuga oid yangiliklar
