Navbahor Hamidovadan Olimpiada va jahon chempioni ustidan sensatsiyali g‘alaba!

Qozog‘istonning Olmaota shahrida o‘tayotgan “World Boxing” tashkiloti kubogining final bosqichi bugun o‘zining eng dramatik va yorqin lahzalaridan birini taqdim etdi. Muxlislar tom ma’noda ringdagi voqealarni nafasini yutib kuzatishdi — chunki -65 kg vazn toifasida O‘zbekiston sharafini himoya qilgan Navbahor Hamidova finalda to‘g‘ridan to‘g‘ri Olimpiada (Tokio-2020) va uch karra Jahon chempioni bo‘lgan turk sportchisi Busenaz Syurmenelini mag‘lubiyatga uchratishga muvaffaq bo‘ldi.

Hakamlar ham ushbu bahsni bir ovozdan (5-0) Navbahorning foydasiga hal qildi. Bu natija nafaqat boks jamoatchiligida, balki butun sport muxlislari orasida katta shov-shuvga sabab bo‘ldi. Hamidovaning iroda va mahorat bilan to‘la jangi Olmaota ringida haqiqiy sensatsiya sifatida yodda qoladigan bo‘ldi.

Shu tariqa bokschilarimiz uchun ushbu musobaqa o‘z nihoyasiga yetdi. Oltin medal va tarixiy g‘alaba nafaqat Navbahor uchun, balki butun O‘zbekiston sport jamoatchiligi uchun g‘urur va ruhlanish manbai bo‘ldi.

Muxlislarimizga eslatib o‘tamiz — Navbahor Hamidova so‘nggi yillarda o‘z yo‘nalishida yetakchi o‘rinni egallab kelmoqda va bugungi g‘alaba uning xalqaro arenani yanada balandroq zabt etishiga zamin yaratdi.

Zamin.uz o‘z o‘quvchilariga boks bo‘yicha barcha muhim yangiliklarni tez va xolis tarzda yetkazishda davom etadi. Qutlov va tabriklar Navbahorga — olg‘a, yangi zafarlar sari! “Zamin”ni Telegramʻda oʻqing!