“Roma” hujumida o‘zgarish: Eldor Shomurodovdan so‘ng kim keladi?

Italiyaning mashhur “Roma” klubi hujum chizig‘ini qayta shakllantirish ustida bosh qotirmoqda. Jamoadan Temmi Abraxamning ketishi va Eldor Shomurodovning yaqinda tark etishi ortidan rimliklar yangi markaziy hujumchi qidiruviga jiddiy kirishdi.

Manbalar ma’lumotiga ko‘ra, “Manchester Yunayted”ning yosh iste’dodi Rasmus Xoylund “Roma”ning diqqat markazida. Janluka Di Marsio ma’lum qilishicha, klub rahbariyati yaqin kunlarda Xoylund bilan muzokaralarni boshlamoqchi. Angliya grandi forvardining narxi hozirda taxminan 45 million yevro atrofida belgilangan. Bu esa rimliklar uchun katta moliyaviy yuk bo‘lishi mumkin.

Mana shu omil tufayli, “Roma” rahbariyati ijara variantini asosiy yechim sifatida ko‘rib chiqmoqda. Xoylundning A Seriyada to‘p surish tajribasi, yoshligi va harakatchan uslubi jamoaning hujum salohiyatini oshirishi kutilyapti. Klub muxlislari esa, yangi mavsum arafasida hujum chizig‘ida qaysi yulduzni ko‘rishlarini intiqlik bilan kutishmoqda.

Ekspertlar ta’kidlashicha, “Roma” jamoasi uchun rasman yangi hujumchi taklif etilishi va uning jamoaga qanday moslashishi juda muhim bo‘ladi. Hozirda jamoa hujumini qayta qurish Yevropa transfer bozoridagi eng muhokama qilinayotgan mavzulardan biriga aylandi. “Zamin”ni Telegramʻda oʻqing!