Xabi Alonso Rodrigoni nega zaxirada qoldirdi — sababi aniq

"Real Madrid" jamoasining yetakchi vingerlaridan biri Rodrigo Goes 2025 yilgi Klublar o‘rtasidagi jahon chempionatida kutilgan darajada ko‘rinmay qoldi. Uning muxlislari va futbol nashrlari orasida braziliyalik hujumchi nega asosiy tarkibdan chetda qolgani haqida savollar ko‘paygan bir paytda, bosh murabbiy Xabi Alonso bu borada oydinlik kiritdi, deb xabar berdi Marca.

Ispaniyalik mutaxassisning so‘zlariga ko‘ra, Rodrigoni zaxirada qoldirish ortida faqatgina taktik qaror turgan. "Men Rodrigoni maydonga tushirmadim, chunki bu o‘yinlarda boshqa futbolchilar bilan g‘alaba qozonish imkoniyati yuqoriroq deb hisobladim. Bu qaror uning kelajagi bilan bog‘liq emas", — deya ta’kidladi Xabi Alonso.

Ma’lumotlarga ko‘ra, Rodrigo guruh bosqichidagi "Al Hilol"ga qarshi o‘yinda faqat 88 daqiqa harakat qilgan. Chorak finalda esa "Borussiya Dortmund"ga qarshi bellashuvda atigi 4 daqiqa maydonda bo‘ldi. U butun musobaqa davomida faqat 1 ta golli uzatma bilan cheklandi. Bu statistika uning real holatini aniq ifodalab turibdi.

Shu bilan birga, Rodrigoning mavsum yakunlanishi bilan "Real"ni tark etishi mumkinligi haqidagi mish-mishlar tobora kuchaymoqda. Unga "Bavariya", "Arsenal", "PSJ" va Saudiya Arabistonining "Al Nassr" jamoalari jiddiy qiziqish bildirmoqda. Agar ushbu transfer amalga oshsa, u yangi muhitda yana o‘zining to‘laqonli salohiyatini namoyon etishi mumkin.

Rodrigoning kam o‘yin amaliyotiga ega bo‘lishi muxlislar orasida turli taxminlarga sabab bo‘lmoqda. Ba’zilar buni Alonso bilan shaxsiy munosabatlardagi sovuqlik deb baholasa, boshqalar uning o‘yin uslubi hozirgi taktikaga mos tushmayotgani bilan bog‘lamoqda. Qanday bo‘lmasin, braziliyalik futbolchining kelajagi tez orada aniqlashishi mumkin.

Zero, Rodrigo kabi iqtidorli futbolchi uchun asosiy tarkibda muntazam o‘ynash hayotiy muhim ahamiyatga ega. Uning "Real"da qolish-qolmasligi esa jamoa transfer siyosati va murabbiyning rejalari bilan bevosita bog‘liq bo‘ladi. “Zamin”ni Telegramʻda oʻqing!