Yevropa va jahon futbol olamida hozirgi kunda eng ko‘p muhokama qilinayotgan jamoalardan biri – Parijning PSJ klubidir. Jamoa oxirgi oylarda erishgan natijalari bilan nafaqat muxlislar, balki mutaxassislar orasida ham katta qiziqish uyg‘otmoqda.
Rossiyalik sobiq futbolchi, mashhur yarim himoyachi Aleksandr Mostovoy ham PSJning hayratomuz yurishi haqida o‘z fikrlarini bildirdi. Uning so‘zlariga qaraganda, parijliklar butunlay boshqa darajadagi o‘yin namoyish etmoqda va bu holatni tushunish ham oson emas.
— Men PSJda nima bo‘layotganini tushunmayapman. Ular Chempionlar ligasini yutib, finalda “Inter”ni yo‘q qildi. Keyin esa klublar o‘rtasidagi jahon chempionatida ishtirok etib, har bir raqibini birin-ketin mag‘lub etyapti. Parijliklar shunchalik kuchlimi? Ular “Real” darvozasiga 4 ta to‘p kiritishdi! Bu juda ta’sirli natija. Ha, menga “Chelsi”ning ham o‘yinlari yoqadi – ularda yangi tarkib va yangi ruh bor, — dedi Mostovoy.
Haqiqatan ham, PSJning so‘nggi davrdagi natijalari diqqatga sazovor. Chempionlar ligasida g‘oliblik, keyin esa klublar o‘rtasidagi Jahon chempionatidagi jadal harakatlar va yuqori tempdagi o‘yinlar jamoani favoritlar qatoriga olib chiqdi. Jamoa o‘yin uslubidagi o‘zgarishlar, kuchli transfer siyosati va mentalitetdagi o‘sish natija bermoqda.
Eng qizig‘i, ushbu ikki jamoa – “Chelsi” va PSJ klublari finalda to‘qnash keladi. Ushbu bellashuv 13 iyul tunda bo‘lib o‘tadi va futbol olami bu to‘qnashuvni sabrsizlik bilan kutmoqda. Parijliklar o‘z yurishlarini davom ettiradimi yoki angliyaliklar shovqinli syurpriz tayyorlaganmi — bu savollarga final javob beradi.
Mostovoyning fikrlari orqali ko‘rinishicha, PSJning hozirgi holati hatto tajribali ekspertlarni ham lol qoldirmoqda. Bu esa jamoaning jahon futbolidagi nufuzi va ta’sirini yanada oshirmoqda. “Zamin”ni Telegramʻda oʻqing!
Ctrl
Enter
Xato topdIngizmi
Iborani ajratib Ctrl+Enter tugmasini bosing Mavzuga oid yangiliklar
