Donnarumma atrofida katta o‘yin: "Chelsi", "Siti" va "Bavariya" bir maydonda

Yevropa futbolida yozgi transfer oynasi qizg‘in pallaga kirdi. E’tibor markazida turgan qahramonlardan biri – Parijning mashhur klubi PSJda faoliyat olib borayotgan va Italiya termasi sharafini himoya qiluvchi tajribali darvozabon Janluiji Donnarumma.

So‘nggi xabarlarga ko‘ra, uning xizmatlariga nafaqat “Chelsi”, balki Yevropa futbolida o‘z o‘rniga ega bo‘lgan yana ikki taniqli klub – “Manchester Siti” va “Bavariya” ham jiddiy qiziqish bildira boshladi, deb xabar berdi insayder Nikolo Skira o‘zining X ijtimoiy tarmog‘ida.

Ma’lumotlarga ko‘ra, har uchala jamoa ham Donnarummaning PSJ bilan amaldagi shartnomasi 2026 yilga qadar davom etishiga qaramasdan, uning atrofidagi vaziyatni diqqat bilan kuzatmoqda. Chunki shartnomani uzaytirish borasida hozircha hech qanday aniqlik mavjud emas. Bu esa klublar uchun imkoniyat eshigini ochadigan holat.

Hozircha Donnarummaning o‘zi ham, PSJ rahbariyati ham biron rasmiy taklif olmagan yoki berishmagan. Biroq futbol olamida tez o‘zgaradigan vaziyatlar va klublarning mustahkam posbonga bo‘lgan ehtiyoji bu transferga yo‘l ochishi mumkin.

Transfermarkt portali ma’lumotiga ko‘ra, 26 yoshli Italiyalik darvozabonning transfer bahosi hozirda 40 million yevro atrofida baholanmoqda. Donnarumma 2024/25 mavsumi davomida PSJ safida 47 o‘yinda maydonga tushdi, 43 ta gol o‘tkazib yubordi va 17 uchrashuvda o‘z darvozasini golsiz saqlashga muvaffaq bo‘ldi. Bu natijalar uning darajasini yana bir bor tasdiqlaydi.

Mazkur raqamlar va uning tajribasi e’tiborga olinganda, Donnarumma Yevropa grandi bo‘lishga munosib nomzod ekanligi shubhasiz. Ayniqsa, “Chelsi” yangi davrda mustahkam darvozabon izlayotgan bir paytda, “Siti”da Edersonning kelajagi mavhum bo‘lib qolayotgan, “Bavariya” esa Noyerdan keyingi avlodni shakllantirishni rejalashtirayotgan bir vaqtda – Donnarumma transferi ular uchun juda muhim va strategik qarorga aylanishi mumkin.

Futbol ishqibozlari endi Donnarummaning taqdiri qanday hal etilishini qiziqish bilan kutmoqda. U Parijda qoladimi yoki yangi da’vatlar yo‘lida qaror qabul qiladimi – buni yaqin kunlar ko‘rsatadi. Yaxshi darvozabon uchun kurash esa endi boshlandi, desak mubolag‘a bo‘lmaydi. “Zamin”ni Telegramʻda oʻqing!