Eldor ketdi, irlandiyalik hujumchi Rimga yaqinlashmoqda

Italyan futbolida yozgi transfer mavsumi qizg‘in pallaga kirdi. Eldor Shomurodov va Temmi Abraxam bilan xayrlashgan “Roma” yangi hujumchi izlashni boshlagan edi. Endi esa, klubning diqqati Angliya Premer-ligasida toblangan irlandiyalik yosh to‘purarga qaratildi, deb xabar berdi Fabritsio Romano.

Gap shundaki, “Brayton” klubi safida to‘p surayotgan Evan Fergyuson faoliyatini Italiyada davom ettirishi mumkin. Mutaxassislar va nashrlar tarqatgan ma’lumotlarga ko‘ra, 20 yoshli markaziy hujumchi yangi mavsumda rimliklar safida ijara asosida harakat qilishi ehtimoli yuqori.

Muzokaralar juda faol va jiddiy kechmoqda. “Bo‘rilar” — aynan shu laqab bilan tilga olinadigan “Roma” rahbariyati Evanning Angliyada olgan maoshini to‘liq to‘lashga tayyor ekanligini bildirgan. Bu esa kelishuvni tezlashtiradigan asosiy omillardan biri sifatida qayd etilmoqda.

Evan Fergyuson o‘tgan mavsumning ikkinchi yarmini “Vest Xem” jamoasida ijarada o‘tkazgan edi. Shu muddat ichida u maydonga tez-tez tushmadi, lekin A Seriyada o‘zini ko‘rsatish imkoniyatini qo‘ldan boy bermasligi mumkin. "Brayton" bilan tuzilgan amaldagi shartnomasi 2029 yilgacha davom etadi, bu esa uning uzoq muddatli loyiha uchun mo‘ljallanganini anglatadi.

Qayd etish joizki, irlandiyalik yosh forvard 2024/25 yilgi mavsumda 23 ta uchrashuvda maydonga tushib, faqat 1 ta gol urgan. Ba’zi ekspertlar buni undagi potensialning to‘liq ochilmagani bilan izohlamoqda. Rimdagi yangi muhit, kuchli raqobat va murabbiylar shtabidagi ishonch Fergyusonni butunlay boshqa darajaga olib chiqishi mumkin.

Uning jismoniy tayyorgarligi, yoshligi va harakatchan uslubi “Roma”ning hujumdagi yangi quroliga aylanishiga umid bog‘lamoqda. Muxlislar esa Eldor va Abraxam ketganidan so‘ng, aynan shu hujumchidan kuchli taassurot kutishmoqda.

Fergyuson “Roma” uchun yangi imkoniyat, u esa o‘zining katta sahnada o‘zini ko‘rsatish uchun yana bir shans deb hisoblamoqda. Har ikki tomon uchun ham katta sinov boshlanmoqda. Shu bois, bu transfer yaqin kunlarda rasman e’lon qilinishi kutilmoqda. “Zamin”ni Telegramʻda oʻqing!