“Manchester Siti” yangilanmoqda: yana ikki veteran jamoani tark etadi

Angliya futbolida katta iz qoldirgan va bir necha mavsumlar davomida “Manchester Siti”ning asosiy ustunlaridan biri bo‘lib kelgan ikki tajribali futbolchi jamoani tark etishi mumkin. Gap Germaniya terma jamoasi sobiq kapitani Ilkay Gyundog‘an va Braziliyaning asosiy darvozaboni Ederson haqida ketmoqda.

Ular endi faoliyatlarini Turkiya Superligasida davom ettirishga tayyorlanmoqda, deb xabar berdi turkiyalik jurnalist Yag‘iz Sabunjuo‘g‘li. Turk ommaviy axborot vositalarida tarqalayotgan ma’lumotlarga ko‘ra, bu ikki yulduz futbolchi “Galatasaroy” bilan muzokara olib bormoqda va kelishuv deyarli yakunlangan.

Ilkay Gyundog‘an 34 yoshda bo‘lishiga qaramay, maydondagi tajribasi, o‘yinni boshqarish mahorati va rahbarlik salohiyati bilan turk futboli uchun muhim topilma bo‘lishi mumkin. Ederson esa hozircha Angliyada yuqori darajadagi o‘yinlarni namoyon etib kelmoqda. Uning to‘sqinlik va tezkor reaksiyasi tufayli ko‘plab muhim o‘yinlar “Siti”ning foydasiga hal bo‘lgan.

Bu futbolchilarning ketishi ortida “Manchester Siti” bosh murabbiyi Xosep Gvardiolaning jamoani yoshartirish siyosati turibdi. U so‘nggi mavsumlarda ham xuddi shunday qarorlar qabul qilgan — Kevin de Bryuyne, Kayl Uoker va Karson Skott singari tajribali futbolchilar bilan xayrlashishga to‘g‘ri kelgan. Bu qarorlar ortida klubning kelajakni ko‘zlab, dinamik va uzoq muddatli tarkib shakllantirish maqsadi yotadi.

Ma’lumotlarga qaraganda, Ederson va Gyundog‘anning “Siti” bilan tuzilgan amaldagi shartnomasi 2026 yil yozida yakunlanadi. Ammo klub bu futbolchilar bilan shartnomani uzaytirish niyatida emas. Aksincha, rahbariyat bu pozitsiyalarga yosh, energiyaga to‘la va istiqbolli futbolchilarni jalb etishga kirishgan.

Ayrim manbalar bu ikki yulduzni allaqachon “Galatasaroy” murabbiyi Okan Burukning transfer ro‘yxatida ko‘rilganini, hatto futbolchilarning o‘zlari ham Turkiyadagi yangi bosqichni qiziqish bilan kutayotganini ma’lum qilmoqda.

Futbol dunyosida bunday o‘zgarishlar tabiiy. Bir jamoa yangi bosqichga o‘tishi uchun tajribali, ammo yoshi o‘tgan futbolchilarni shunchaki “rahmat” bilan kuzatishi kerak bo‘ladi. Bu holatda ham barcha tomonlar — futbolchilar, klub va muxlislar — kutilgan manfaatni olishlari mumkin.

Endi esa futbol muxlislari katta qiziqish bilan Gyundog‘an va Edersonning Turkiyadagi ehtimoliy faoliyatini kutmoqda. Ularni yangi chempionatda, yangi raqiblar va yangi muhitda ko‘rish nafaqat turk, balki butun jahon futboli uchun qiziqarli tajriba bo‘ladi. “Zamin”ni Telegramʻda oʻqing!