Angliyaning yetakchi klublaridan biri “Manchester Siti” murabbiylar shtabi ancha vaqtdan buyon bashorat qilib kelgan muhim masalaga aniq yechim topdi, deb xabar berdi theathletic.com.
Gap shundaki, “shaharliklar” o‘zining asosiy darvozaboni Edersonga munosib zaxirachi izlash jarayonida edi. Ushbu vazifa klub uchun ayniqsa muhim sanalgan va katta diqqat bilan yondoshilgan masalalardan biriga aylangandi.
The Athletic'ning ma’lum qilishicha, manchesterliklar o‘z akademiyasida ulg‘aygan iqtidorli posbon Jeyms Traffordni jamoaga qaytarish bo‘yicha “Byornli” klubi bilan kelishuvga erishgan. Qizig‘i shundaki, “Siti” 2023 yili Traffordni 14 million funt evaziga “Byornli”ga sotgan edi.
Endi esa “Manchester Siti” 22 yoshli darvozabon uchun deyarli ikki karra katta to‘lov – 27 million funt sarflab, uni yana jamoaga qaytarib oldi. Bu qaror “shaharliklar”ning asosiy tarkibidagi raqobatni kuchaytirish hamda kelajakdagi uzluksiz muvaffaqiyat uchun qo‘yilgan jiddiy qadam sifatida baholanmoqda.
Manbaga ko‘ra, Jeyms Trafford yaqin kunlarda tibbiy ko‘rikdan o‘tib, “Siti” bilan rasman shartnoma imzolaydi. Klub yosh va iqtidorli posbonga 5+1 yillik bitim taklif qilmoqda.
Ushbu transfer orqali “Manchester Siti” o‘z darvozasiga ishonchli va kelajagi porloq futbolchini qaytarib, muxlislarda katta umid uyg‘otdi. Traffordning yana “Etixad”da bo‘lishi klub uchun ham, uning faoliyati uchun ham yangi imkoniyatlar eshigini ochadi.
