O‘zbekiston milliy terma jamoasi hujumchisi Abbosbek Fayzullayev Rossiya Premer-ligasidagi faoliyatiga nuqta qo‘ydi. Endi u “Istanbul Bashakshehir” klubi safida Turkiya Superligasida to‘p suradi.
Transfer tafsilotlari
SSKA o‘zbek legionerini 7,5 million yevroga Turkiya klubiga sotdi. Bundan tashqari, “armiyachilar” bonus tariqasida yana 2,5 million yevro olishlari mumkin. Abbos turklar bilan “3+1” formatidagi shartnoma imzoladi.
Tabiiyki, bu transfer SSKA safida uning jamoadoshlari tomonidan ham diqqat bilan kuzatildi va ular o‘z munosabatlarini bildirishdi.
Igor Diveyev: “Bu uning orzusi edi”
“Abbosning ketishi jamoa uchun yo‘qotishmi? Yo‘qotish yoki yo‘q deb aniq ayta olmayman. Bir narsa aniq — u Yevropaga ketdi va bu uning orzusi edi. Turkiya esa unga to‘g‘ri keladi. U yerdan o‘zi istagan ligasiga o‘tish imkoni katta”, — dedi SSKA himoyachisi Igor Diveyev.
Danil Krugovoy: “U qaytishga va’da bergan”
“Hammamiz uni sog‘inib qolamiz. Ammo u qaytishga va’da bergan. Menimcha, Turkiya chempionati jahon chempionatidan oldin Abbos uchun tramplin bo‘ladi. U yaxshi inson va a’lo darajadagi o‘yinchi. U bilan o‘ynash rohatning o‘zginasi. Ayniqsa, 3-4-3 sxemasida, u qanot hujumchisi sifatida, men esa chap tomonda o‘ynaganimda hammasi zo‘r chiqardi.”, — deb ta’kidladi Krugovoy.
SSKAdagi ikki yil — raqamlar orqali
Abbos Fayzullayev 2023 yil avgust oyida “Paxtakor”dan SSKAga 500 ming yevro evaziga o‘tgandi. Ortidan esa qisqa vaqtda jamoa yetakchisiga aylandi.
- 72 o‘yin
- 8 gol
- 22 assist
- Rossiya Premer-ligasi bronza medali
- Kubok va Superkubok sohibi
Yakuniy xulosa
Abbos Fayzullayevning yangi sahifasi Turkiyada ochildi. Undan katta umidlar bor — nafaqat o‘zbekistonlik muxlislar, balki Yevropa skautlari ham uning harakatlarini diqqat bilan kuzatmoqda.
“Istanbul Bashakshehir” uni strategik loyiha sifatida qabul qilgan — bundan hammamiz faqat xursand bo‘lishimiz mumkin.
