Fransiya va dunyo futboli yulduzi, “Real” jamoasi hujumchisi Kilian Mbappe atrofida yana qiziqarli voqea muhokama markaziga aylandi. Fransiyaning mashhur “Le Canard enchaîné” satirik nashrida chiqqan xabarga ko‘ra, futbolchi o‘tgan yili Fransiyada o‘tkazilgan Olimpiya o‘yinlarining ochilish marosimida mash’alani ko‘tarish taklifidan bosh tortgan. Bu ma’lumot ko‘plab muxlislar va ommaviy axborot vositalari e’tiborini tortdi, deb yozadi fransuz nashri.
Kilian Mbappe esa bu xabarga o‘ziga xos yumor bilan javob berdi: “Kulaverib o‘lay dedim. Hatto, men Fransiya basketbol terma jamoasining asosiy tarkibida maydonga tushmoqchi bo‘lganimni ham esdan chiqarib qo‘yibsizlar. Ochig‘i, Olimpiya o‘yinlari vaqtida men dunyoning boshqa burchagida ta’tilda edim. Mash’alani ko‘tarish haqida hech qanday tajribaga ega emasman va men uchun bu ishning mantig‘i yo‘q edi”, – dedi yulduz futbolchi.
Matbuotda tarqalgan ma’lumotlarga ko‘ra, Fransiya hukumati rasman Mbappega Olimpiya mash’alasini ko‘tarish taklifini yo‘llagan. Ammo Mbappe ushbu marosimda ishtirok etishning o‘zi uchun ahamiyati yo‘q ekanini aniq ko‘rsatdi.
Ekspertlar va muxlislar bu vaziyatga turlicha munosabat bildirishmoqda. Bir tomondan, mashhur sportchilarning Olimpiya o‘yinlari kabi tarixiy tadbirlarda qatnashishi milliy iftixor deb qaralsa, boshqa tomondan, har bir atlet o‘z shaxsiy rejalari va professional faoliyatini ustun qo‘yishi tabiiy.
Mbappening ayni paytda “Real” safida faoliyat yuritayotgani va Fransiya terma jamoasidagi mashg‘ulotlarga katta e’tibor qaratayotgani ham uning shaxsiy qarorlariga ta’sir qilgani aytiladi.
Yangi mavsum oldidan Mbappega va unga bog‘liq har qanday yangilikka e’tibor susaymaydi – uning har bir harakati va so‘zlari futbol olamida doimo qiziqish uyg‘otadi.
