Yangi sport mavsumi UFC oktagonida qizg‘in to‘qnashuvlarga boy bo‘lishi kutilmoqda. O‘rta vazndagi amaldagi chempion Drikus Dyu Plessi o‘zining bo‘lajak raqibi Xamzat Chimayev haqida ochiqchasiga fikr bildirdi. Chempionning bu gaplari muxlislar orasida katta qiziqish uyg‘otdi.
Janubiy afrikalik Dyu Plessiga ko‘ra, jamoatchilik Xamzat Chimayevning fizik tayyorgarligi va mashg‘ulot jarayonidagi taraqqiyotini katta muhokama qilishmoqda. "Ko‘pchilik Chimayevning kardiosi yaxshilangani va bu menga qarshi bahsda yashirin kuchga aylanishi mumkinligini aytadi. Odamlar gapiga qaraganda, Xamzat yangi murabbiy bilan jiddiy tayyorgarlik ko‘ryapti. Men bu holatga faqat xursand bo‘lishim mumkin – Xamzat jangdan atigi besh hafta oldin men hayotim davomida doim amalga oshirib kelgan mashqlarni boshlabdi," – deydi chempion.
Dyu Plessi o‘z tayyorgarligidan mamnun ekanini ta’kidlar ekan, bu uning uchun yangilik emasligini, har bir jangi oldidan ana shunday qattiq mehnat qilishini alohida urg‘uladi. "To‘g‘ri, Chimayev – ajoyib raqib. Biroq, men uni yengishga va jahonni yana hayratga solishga intilaman," – deya gapini yakunladi u.
Ma’lumot uchun, Dyu Plessi (23-2) va Chimayev (14-0) o‘rtasidagi kutilgan to‘qnashuv 17 avgust kuni "UFC 319" musobaqasi doirasida bo‘lib o‘tadi. Bu jang nafaqat UFC muxlislari, balki butun jahon sport jamoatchiligi uchun intrigali va katta ahamiyatga ega.
Muxlislar esa ushbu to‘qnashuvda kimning ustun kelishi, chempionlik kamari kimga nasib etishi va oktagonda qanday dramatik voqealar bo‘lishini katta qiziqish bilan kutmoqda. Jang oldidan har ikki sportchi ham o‘z maqsadlari va intilishlari bilan maydonga chiqishadi — intriga avjida!
