Bugun “Santyago Bernabeu”da Madridning “Real” klubi navbatdagi yosh va iqtidorli futbolchi bilan tarixiy sahifani ochdi. 18 yoshli argentinalik yarim himoyachi Franko Mastantuono rasman “qirollik klubi” a’zosi sifatida taqdim etildi. U “River Pleyt”dan 45 million yevroga transfer qilindi va bu kelishuv yosh futbolchi uchun katta qadam bo‘ldi.
Peresning samimiy so‘zlari
“Real” prezidenti Florentino Peres taqdimot marosimida yosh futbolchini iliq so‘zlar bilan kutib oldi:
— Bugun klubimiz uchun ham, siz uchun ham o‘ziga xos kun. So‘nggi yillarda futbolda porlagan eng iste’dodli yoshlardan biri bizning safimizga qo‘shilyapti. Qadrli Mastantuono, tug‘ilgan kuningizda orzuyingiz amalga oshgani bilan tabriklayman. “River Pleyt” – “Real” tarixi bilan uzviy bog‘liq klub va siz bugun bizda o‘ynagan nufuzli argentinaliklar ro‘yxatiga qo‘shilasiz. Endi siz 15 marta Yevropa chempioni bo‘lgan jamoaning oq libosini kiyasiz. Biz bilan bo‘lishga qaror qilganingiz uchun katta rahmat, — dedi Peres.
“River Pleyt”dan “Bernabeu”ga
Mastantuono uchun bu transfer nafaqat yangi klub, balki yangi bosqich, katta bosqich. “River Pleyt”da u yosh bo‘lishiga qaramay, asosiy tarkibda o‘zini ko‘rsata olgan va Yevropaning bir nechta grand klublari e’tiborini tortgan edi.
Muxlislar intizori
Endilikda “Real” ishqibozlari yangi mahoratli yarim himoyachini La Ligada va Yevropa maydonlarida ko‘rishni intizorlik bilan kutmoqda. Franko uchun esa Madriddagi har bir o‘yin o‘z iste’dodini namoyon etish va Peres aytganidek, klub nufuziga munosib bo‘lish imkoniyati hisoblanadi.
