O‘tgan mavsum Angliya maydonlarida kutilmagan holda yuqori o‘rinlar uchun kurashgan “Nottingem Forest” klubi muxlislar xotirasida yaxshi taassurot qoldirgan edi. Ammo bu yil kutilmagan qaror qabul qilindi: rahbariyat bosh murabbiy Nuno Eshpiritu Santuni lavozimidan ozod qildi. Bu haqda insayder Motteo Moretto ma’lumot berdi. Unga ko‘ra, klub rahbarlari bir hafta oldin “Sky Sports”ga berilgan intervyudan keyin mutaxassis bilan hamkorlikni davom ettirishdan voz kechishgan.
Nuno o‘sha suhbatida jamoa holatini ochiqchasiga baholab, qator tanqidiy fikrlarni bildirgan edi. Uning ta’kidlashicha, tarkib jihatidan klub yetakchi raqiblardan orqada qolgan, transferlar oynasida rejalashtirilgan yo‘nalishlar amalga oshmagan, jamoa tayyorgarligi esa kutilgandek darajada bo‘lmagan. “Biz qaysi futbolchilar bilan mavsumni boshlashimizni ham aniq bilmadik. Ayrimlar ijaraga ketishini bila turib, tarkibda qoldi. Bu esa katta muammolar keltirib chiqardi”, — degan edi Santu o‘ziga xos ochiqlik bilan.
Shu fikrlar rahbariyatni qattiq bezovta qilgani aytiladi. Klub egalarining fikricha, murabbiyning bunday bayonotlari jamoa ichida ishonch va birdamlikni buzishi mumkin edi. Shuning uchun u bilan yo‘llarini ajratish to‘g‘risida qaror qabul qilindi.
Nuno Eshpiritu Santu o‘z vaqtida Saudiyaning “Al-Ittihod” klubida ishlaganidan so‘ng, “Nottingem” rulini qabul qilib olgan edi. Uning qo‘li ostida jamoa o‘z o‘yinini ancha yaxshilab, Angliya Premer-ligasida so‘nggi mavsumni kutilmagan tarzda 7-o‘rin bilan yakunladi. Bu natija klubning so‘nggi yillardagi eng muvaffaqiyatli ko‘rsatkichi sifatida qayd etildi.
Biroq futbolda doimiy barqarorlikni saqlab qolish oson emas. Rahbariyatning navbatdagi qarorini kimdir to‘g‘ri, kimdir noto‘g‘ri deb baholashi mumkin. Ammo haqiqat shundaki, Santuning yo‘li klub bilan tugadi va endi “Nottingem Forest” yangi bosh murabbiy izlash jarayonini boshlaydi.
Muxlislar uchun eng qiziq savol — jamoani keyingi mavsumda kim boshqaradi va klub yana yuqori maqsadlar uchun kurasha oladimi?
