«Fenerbahche» sensatsiyali ravishda Mourinoni iste’foga chiqardi

Turkiyaning mashhur klubi «Fenerbahche» rasmiy bayonot orqali bosh murabbiy Joze Mourino bilan shartnoma bekor qilinganini ma’lum qildi.

27-avgust, chorshanba kuni jamoa Chempionlar ligasi pley-off bosqichida «Benfika»ga qarshi bahsda imkoniyatdan mahrum bo‘lib, turnirdagi ishtirokiga barham berdi.

— 2024/2025 yilgi mavsumdan buyon jamoamizni boshqarib kelayotgan Joze Mourino bilan xayrlashishga qaror qildik. Klub unga «Fenerbahche» rivojiga qo‘shgan hissasi uchun minnatdorchilik bildiradi va kelgusi faoliyatida omad tilaydi, — deya qayd etildi klubning matbuot xizmati tomonidan X ijtimoiy tarmog‘ida e’lon qilingan rasmiy xabarida.

62 yoshli portugaliyalik mutaxassis «Fenerbahche»ni 2024-yildan beri boshqarib kelayotgan edi. Uning rahbarligida jamoa milliy chempionatda 2-o‘rinni egallab, muxlislar orasida umid uyg‘otgandi.

Joze Mourino ilgari Yevropaning eng nufuzli klublaridan «Real Madrid», «Chelsi», «Inter», «Tottenhem» va «Roma» kabi jamoalarda ishlab, katta tajriba to‘plagan.

Muttaxassislar fikricha, Mourino bilan yo‘llarni ajratish «Fenerbahche»ning yaqin kelajakdagi yo‘nalishi va istiqbollariga katta ta’sir ko‘rsatishi mumkin. Muxlislar esa klubning yangi bosh murabbiyi kim bo‘lishini qiziqish bilan kutmoqda.