Eron Afg‘onistonni mag‘lub etdi va musobaqani g‘alaba bilan boshladi

Toshkent va Dushanbe shaharlarida start olgan «CAFA Nations Cup-2025» turnirining ilk tur uchrashuvlari qizg‘in tarzda boshlandi.

B guruhidan o‘rin olgan dastlabki bellashuv Dushanbeda bo‘lib o‘tdi. Unda Eron milliy termasi Afg‘oniston jamoasiga qarshi maydonga tushdi va 3:1 hisobida munosib g‘alabaga erishdi.

Uchrashuv ssenariysi juda shiddatli tarzda boshlandi. Avval 21-daqiqada afg‘onlar safida Omid Musavi hisobni ochib, jamoasiga ustunlik olib berdi. Biroq ortidan eronliklar tashabbusni qo‘lga olishdi. 27-daqiqada Majid Hosseini hisobni tenglashtirdi. Shundan so‘ng Amirhossein Hosseinzadeh sahnaga chiqdi — u 37 va 63-daqiqalarda gol urib, dublga erishdi hamda g‘alabani o‘z jamoasiga ta’minladi.

Shu tariqa, Eron musobaqani ishonchli g‘alaba bilan boshladi. Afg‘oniston esa barcha kuchini sarf etgan bo‘lsa-da, raqibning ustun o‘yiniga qarshi tura olmadi.

Guruhdagi keyingi bahsda esa mezbon Tojikiston milliy jamoasi Hindistonga qarshi maydonga tushishi kutilmoqda.

29-avgust. Dushanbe

Gollar: Majid Hosseini (27), Amirhossein Hosseinzadeh (37, 63) — Omid Musavi (21)

Muttaxassislar fikricha, Eronning bu ishonchli starti ularning guruhdagi yetakchilik imkoniyatlarini yanada oshirdi. Muxlislar esa keyingi turlarda yana qanday sensatsiyalar bo‘lishini kutmoqda.