Saudiya Arabistoni Pro ligasining 3-turidan o‘rin olgan markaziy bahsda «An Nasr» o‘z maydonida «Ar Riyod»ni qabul qildi va muxlislar uchun esdan chiqmas tomosha namoyish etdi. Krishtianu Ronaldu va Joau Feliksning a’lo darajadagi o‘yini, shuningdek, Kingsli Komanning goli jamoaga yirik hisobda zafar keltirdi – 5:1.
Uchrashuvning dastlabki daqiqalaridayoq mezbonlar ustunligi ko‘zga tashlandi. 6-daqiqadayoq Feliks hisobni ochdi va «An Nasr»ga yengillik baxsh etdi. 30-daqiqada Kingsli Komanning aniq zarbasi ustunlikni ikki baravar oshirdi. Oradan ko‘p o‘tmay, 33-daqiqada Ronaldu o‘zining klassik gollaridan birini yo‘llab, muxlislarni quvonchga to‘ldirdi.
Ikkinchi bo‘limda ham hujumlar to‘xtamadi. 49-daqiqada Feliks o‘zining ikkinchi golini kiritib, dubl qayd etdi. Birozdan keyin mehmonlar Mamad-u Silla orqali hisobni qisqartirishga muvaffaq bo‘ldi. Ammo baribir so‘nggi so‘zni Ronaldu aytdi – 76-daqiqada u yana bir gol urib, o‘yinda dublni qayd qildi.
Saudiya Pro ligasi. 3-tur
An Nasr – Ar Riyod – 5:1
Gollar: Feliks 6, 49, Ronaldu 33, 76, Koman 30 – Mamad-u Silla 51.
Portugaliyalik yulduz shu tariqa o‘z karerasidagi 944 va 945-gollarini urdi. Endi unga tarixiy minglik marrasigacha atigi 55ta gol qoldi. Uning mashhur gol seriyasi yanada qiziqish uyg‘otmoqda.
«An Nasr» esa ushbu g‘alabadan so‘ng 3-tur natijalariga ko‘ra 9 ochko jamg‘ardi va chempionlikka asosiy da’vogarlardan biri sifatida peshqadamlikka chiqdi. «Al Ittihod» ham xuddi shuncha ochkoga ega bo‘lib, turnirning yuqori qismida raqobat kuchaymoqda.
“Zamin”ni Telegramʻda oʻqing!
