38 yoshni qarshilagan va hozirda mutlaq jahon chempioni maqomiga ega bo‘lgan ukrainalik mashhur bokschi Aleksandr Usik yaqinda o‘ziga ulkan shon-shuhrat olib kelgan yo‘l va siri haqida to‘xtalib o‘tdi. Uning fikricha, har qanday muvaffaqiyat ortida sabr, intizom va uzluksiz mehnat turibdi.
«Hayotda hech qanday narsa osongina qo‘lga kirmaydi. Bola chog‘imdanoq menga intizom, matonat va o‘zini fido qilish fazilatlari asos bo‘lib xizmat qildi. Ana shu qadriyatlar meni kamolga yetkazdi, qiyin damlarda kuch bag‘ishladi va yiqilgan paytlarimda yana tiklanishimga yordam berdi. Intizom – men uchun ilhomning bosh manbai, olg‘a intilishim uchun turtki va har qanday sinovlarda eng ishonchli tayanch nuqtam bo‘ldi», – dedi Usik.
Bokschi o‘z sport yo‘lida to‘plagan sovrinlarini oddiy bir jihoz sifatida emas, balki ko‘p yillik mehnatning mevasi sifatida qabul qilishini qo‘shimcha qildi. «Men Olimpiadada oltin medalga erishdim, ikki vazn toifasida mutlaq chempionlikni qo‘lga kiritdim. Lekin bunga yolg‘izgina ringda kurashib emas, menga ishongan, orqamda turgan insonlarning qo‘llab-quvvatlovi bilan erishdim. Shu bois bu kamarlar oddiy metall yoki teridan tayyorlangan buyum emas. Ular ko‘p yillik mashaqqat, mehr va sadoqatning timsoli!» – deya ta’kidladi Usik.
Ma’lumot uchun, Aleksandr Usik hozirda nafaqat ukrain sportida, balki butun jahon boks tarixida ham eng yirik va e’tirof etilgan chempionlardan biri sifatida nom qozongan. Uning nomini tilga olishning o‘ziyoq sport olamida kuch, matonat va professionallik bilan bog‘lanadi.
“Zamin”ni Telegramʻda oʻqing!
