Bundesliganing 5-turida Myunxenning mashhur “Bavariya” klubi o‘z maydonida “Verder” jamoasiga qarshi yirik va ishonchli 4:0 hisobida g‘alaba qozondi. Bu bellashuv nafaqat myunxenliklar uchun, balki jamoa hujumchisi Xarri Keyn uchun ham tarixiy ahamiyatga ega bo‘ldi.
Uchrashuvda ingliz forvardi jamoasi tarkibida dubl muallifiga aylanib, Yevropa “Top-5” ligalarida bir klub safida eng tezkor ravishda 100 ta gol urgan futbolchi sifatida tarixga kirdi. Bu rekord futbol olamida katta qiziqish uyg‘otdi.
Ma’lumotlarga ko‘ra, Keyn atigi 104 ta rasmiy o‘yinda 100 ta gol urdi. Undan avval Krishtianu Ronaldu “Real Madrid”da va Erling Xoland “Manchester Siti”da shu ko‘rsatkichga erishish uchun 105 ta bahsda ishtirok etgandi. Shu tariqa, Keyn ulardan bir qadam oldinga o‘tib, yangi rekordni belgiladi.
E’tiborli jihati shundaki, angliyalik hujumchi Germaniya chempionatidagi 68 ta bellashuvda 72 ta gol kiritgan. Bu ko‘rsatkich uni Bundesliga tarixidagi eng samarali futbolchilardan biri sifatida namoyon qilmoqda.
Futbol mutaxassislari va muxlislar Keynning bu rekordini yuksak baholab, uning keyingi mavsumlarda ham yanada ko‘p yutuqlarga erishishiga ishonch bildirishmoqda.
“Zamin”ni Telegramʻda oʻqing!
