Futbol dunyosida juda kam uchraydigan holat Turkiya chempionati ikkinchi divizionida ro‘y berdi. Bir necha yildan beri mag‘lubiyatlardan bosh ko‘tarolmayotgan “Yeni Malatyaspor” klubi nihoyat shunday qora seriyaga nuqta qo‘yishga muvaffaq bo‘ldi.
Jamoa 60 ta o‘yindan iborat mag‘lubiyatlar silsilasini to‘xtatib, ikkinchi divizionning navbatdagi turida “Anqara Demirspor”ga qarshi maydonga tushdi va bahs 1:1 hisobidagi durang bilan yakunlandi. Bu natija “Yeni Malatyaspor” uchun oxirgi uch yildagi eng muhim voqealardan biri sifatida ta’riflanmoqda.
Shu tariqa, klub 974 kundan keyin birinchi marta ochkoni qo‘lga kiritdi. Oxirgi marta “Yeni Malatyaspor” 2023-yilning 29-yanvarida “Eyupspor”ni 2:1 hisobida mag‘lub etganida ochkoni qo‘shib olgan edi. Shu vaqtdan beri butun boshli mavsumlar davomida jamoa maydonda faqat mag‘lubiyatlar bilan qayd etilib keldi.
Ammo bugungi holatda “Yeni Malatyaspor”ning ahvoli oson emas. Jamoa hozir Turkiya ikkinchi divizionida -35 ochko bilan eng so‘nggi pog‘onada joylashgan. Buning sababi esa, FIFA tomonidan moliyaviy qonunbuzarlik uchun bergan qattiq jazodir. Xususan, mavsum boshlanishidan oldin jamoadan 36 ochko olib tashlangan.
Qizig‘i shundaki, bu klub 2021/2022 yilgi mavsumda Turkiya Superligasida ishtirok etgan va elita divizionda o‘ynagan edi. Biroq, chempionat yakuniga ko‘ra, klub quyi ligaga tushib ketdi. Shundan keyingi davr esa butunlay mag‘lubiyatlar ohangida kechdi.
Hozirgi kunda esa “Yeni Malatyaspor” uchun har bir ochko qimmatli. Ular kelgusi turlarda kamida yana bir necha bor musobaqada o‘zini ko‘rsatishga intilmoqda. Bu durang esa klub tarixidagi og‘ir pallani biroz bo‘lsa ham yengillashtirib, muxlislarga ozgina umid uyg‘otdi.
“Zamin”ni Telegramʻda oʻqing!
