Urazbaxtin: Sovg‘a bir o‘yinchiga emas, jamoaga berilishi kerak

«Qayrat» bosh murabbiyi Rafael Urazbaxtin klub futbolchilariga berilgan shaxsiy sovg‘alar masalasida o‘z pozitsiyasini bildirdi. Uningcha, jamoaviy sportda bir o‘yinchiga alohida e’tibor qaratish to‘g‘ri emas, yordam bo‘lsa ham barchaga yoki klub infratuzilmasiga yo‘naltirilgani ma’qul.

Avvalroq 18 yoshli darvozabon Sherxon Xolmirzaga «Real»ga qarshi Chempionlar ligasidagi o‘yindan (0:5) so‘ng avtomobil sovg‘a qilingani ma’lum bo‘lgandi. Urazbaxtin bu kabi tashabbuslarni taqiqlab bo‘lmasligini aytdi, biroq prinsipial nuqtayi nazarini ochiq bayon etdi.

«Tadbirkorlarning sovg‘alarini man qilish qo‘limizdan kelmaydi. Lekin bu — jamoaviy sport. Bir o‘yinchiga alohida sovg‘a berilishi adolatli emas, deb hisoblayman. Agar yordam qilmoqchi bo‘lsa, butun jamoaga ulashishsin yoki klubga foydasi tegadigan ish qilsin — masalan, avtobus, mikroavtobus olib bersin. Biz — bir jamoamiz, siyosatimiz ham shundan iborat», — dedi mutaxassis.

Urazbaxtinning ta’kidlashicha, u hech kimga «ma’ruza» qila olmaydi, ammo ichki muhit va barcha ishining bitta maqsadga yo‘nalgani nuqtayi nazaridan alohida ajratishlar keraksiz taranglik keltirib chiqarishi mumkin. «Biror narsa bersangiz — hammaga bering yoki klub ixtiyoriga yo‘naltiring», — deya qo‘shimcha qildi u.

Murabbiyning bu bayonoti klub ichida birdamlik va tengtaqsimlik tamoyillarini mustahkamlashga qaratilgani bilan muxlislar tomonidan ham qizg‘in muhokama qilinmoqda.