FIFA kunlari doirasida terma jamoalarning o‘rtoqlik bahslari qizg‘in tarzda davom etmoqda. Bugun Koreya Respublikasi o‘z maydonida — poytaxt Seulda Braziliya terma jamoasini qabul qildi. Uchrashuv “Seul Jahon Kubogi” stadionida bo‘lib o‘tdi va mezbonlar uchun omadsiz tugadi.
Jahonning eng kuchli termalaridan biri hisoblangan Braziliya bu bellashuvda raqibini maydonning har bir nuqtasida ortda qoldirdi. O‘yin davomida Estevao va Rodrigo dubl qayd etdi, Vinisius Junior esa jamoaning beshinchi golini urdi.
Xalqaro o‘rtoqlik uchrashuvi
“Seul Jahon Kubogi” stadioni
Janubiy Koreya — Braziliya 0:5
Gollar: Estevao (13’, 47’), Rodrigo (41’, 49’), Vinisius Junior (77’)
Bellashuvning ilk qismidayoq braziliyaliklar ustunlikni qo‘lga kiritdi. 13-daqiqada Estevao jamoasiga hisobda peshqadamlik berdi, 41-daqiqada esa Rodrigo hisobni ikki baravar oshirdi. Ikkinchi taym boshlanishi bilan Braziliya yana faol o‘yin ko‘rsatib, raqibni to‘liq bosim ostida ushladi.
47-daqiqada Estevao yana bir bor to‘pni darvozaga joyladi, oradan ko‘p o‘tmay Rodrigo o‘zining ikkinchi golini kiritdi. Uchrashuv yakuniga yaqin Vinisius Junior ham o‘z hissasini qo‘shib, hisobni 5:0 ko‘rinishiga yetkazdi.
Koreya termasi o‘yin davomida bir necha imkoniyat yaratdi, ammo Braziliya himoyasi va darvozabonining ishonchli o‘yini sabab gol urishning iloji bo‘lmadi.
Braziliya terma jamoasi endi navbatdagi o‘rtoqlik bahsini 14-oktyabr kuni Yaponiyaga qarshi o‘tkazadi. Uchrashuv Tyofu shahrida bo‘lib o‘tadi va u Janubiy Amerika chempionlari uchun navbatdagi muhim sinov bo‘ladi.
Koreya termasi esa bu mag‘lubiyatdan zarur xulosa chiqarib, kelgusi bahslarda xatolarni takrorlamaslikka harakat qiladi.
“Zamin”ni Telegramʻda oʻqing!
