Tokiodagi “Adzinomoto” stadionida o‘tgan yorqin o‘rtoqlik uchrashuvi futbol muxlislarini hayratga soldi — Yaponiya milliy terma jamoasi Braziliya ustidan irodali g‘alabani qo‘lga kiritdi. Bellashuv gollarga boy bo‘lib, 3:2 hisobida yakunlandi.
O‘yinning ilk qismida braziliyaliklar ustunlikni qo‘lga oldi. 26-daqiqada Paulo Enrike hisobni ochdi, ortidan esa Gabriel Martinelli 32-daqiqada ikkinchi golni kiritib, hisobni 2:0 qildi. Shu paytda ko‘pchilik braziliyaliklardan navbatdagi oson g‘alabani kutgan edi.
Biroq ikkinchi bo‘limda maydonda mutlaqo boshqa manzara namoyon bo‘ldi. Yaponlar o‘zini yo‘qotmadi va jamoaviy ruh bilan o‘yinni tubdan o‘zgartirishga kirishdi. 52-daqiqada sardor Takumi Minamino hisobni qisqartirdi, undan 10 daqiqa o‘tib Keito Nakamura ta’sirli zarba bilan hisobni 2:2 qildi.
Shiddat avjida ketar ekan, 71-daqiqaga kelib “Feyenoord” hujumchisi Ayase Ueda hal qiluvchi golni urdi — natija 3:2! Bu zarba Yaponiya uchun nafaqat g‘alabani, balki katta sport iftixorini ham olib keldi.
To‘liq hisob:
Yaponiya – Braziliya 3:2
Gollar: Takumi Minamino (52'), Keito Nakamura (62'), Ayase Ueda (71') — Paulo Enrike (26'), Gabriel Martinelli (32').
Eslatib o‘tamiz, Braziliya uch kun oldin Janubiy Koreyaga qarshi bahsda 5:0 hisobida yirik g‘alaba qozongan edi. Yaponiya esa Paragvay bilan 2:2 hisobida durang qayd etgan edi.
Bu safar esa Tokio osmoni ostida tarixiy natija qayd etildi — Samuraylar futbolning yirik jamoasi ustidan kurashib, haqli g‘alaba qozonishdi. Ular nafaqat natija, balki iroda va jamoaviy uyg‘unlik bilan ham butun dunyo muxlislarini lol qoldirishdi.
“Zamin”ni Telegramʻda oʻqing!
