Xorvatiya terma jamoasi va “Milan” klubining tajribali yarim himoyachisi Luka Modrich faoliyatini tugatgach, o‘zining sobiq jamoasi “Real Madrid”ga qaytadi. Bu haqda ispaniyalik jurnalistlarga tayangan holda DefensaCentral xabar berdi.
Manbalarga ko‘ra, 40 yoshli futbolchi faoliyatni yakunlagach, “Los-Blancos” akademiyasida murabbiy sifatida ish boshlaydi. Modrichning “Real” prezidenti Florentino Peres bilan yaqin aloqalari tufayli bu taklif ancha oldin muhokama qilingan va futbolchi uni qabul qilgan.
Ma’lum qilinishicha, Modrich hozirning o‘zida murabbiylik litsenziyasini qo‘lga kiritish uchun tayyorgarlik ko‘rmoqda. U bu mavsum yakuniga qadar maxsus kurslarda o‘qishni rejalashtirgan va shu orqali futbolchilikdan murabbiylikka bosqichma-bosqich o‘tishni maqsad qilgan.
“Milan” bilan amaldagi shartnomasi 2026 yilning yozigacha mo‘ljallangan bo‘lib, unda tomonlar kelishuvni yana bir yilga uzaytirish imkoniyatiga ham ega. Biroq, ichki manbalar ma’lumotiga ko‘ra, xorvat futbolchisi o‘zining so‘nggi professional mavsumini aynan Italiya klubida o‘tkazishni xohlamoqda.
Luka Modrich faoliyati davomida Yevropaning eng yuqori darajadagi futbolchilaridan biri sifatida tanilgan. U 2018 yilda “Oltin to‘p”ni qo‘lga kiritib, Ronaldu va Messining ko‘p yillik hukmronligiga chek qo‘ygan ilk futbolchi sifatida tarixga kirgan edi.
Uning “Real” safidagi 10 yildan ortiq faoliyati davomida Modrich besh marta Chempionlar ligasi, to‘rt marta klublar o‘rtasidagi jahon chempionati va bir nechta ichki chempionliklarni qo‘lga kiritgan. Shu bois “Real” rahbariyati uning tajribasini yosh futbolchilar uchun katta maktab sifatida ko‘rmoqda.
“Luka har doim aql bilan o‘ynagan, har bir harakatida tarbiya va professionallik ko‘ringan. Biz uning klubga qaytishi orqali yoshlar uchun ilhom manbai yaratishni istaymiz”, — degan klubdagi manba DefensaCentral’ga.
Modrichning “Real” akademiyasiga qaytishi nafaqat ramziy, balki strategik ahamiyatga ham ega bo‘ladi. Uning yetakchilik fazilatlari va to‘p bilan ishlash madaniyati yosh futbolchilar uchun amaliy namuna bo‘lishi kutilmoqda.
Hozircha futbolchi “Milan” safida mavsumni kuchli yakunlashni va Italiyada so‘nggi marta katta sahnada o‘ynashni rejalashtirmoqda. Shundan so‘ng esa uni “Real”ning qimmatli tarkibida yangi — murabbiylik yo‘li kutmoqda.
“Zamin”ni Telegramʻda oʻqing!
