O‘zbekiston milliy terma jamoasi bosh murabbiyi, Italiya futboli afsonasi Fabio Kannavaro yana Yevropa markazida. U bu safar nafaqat murabbiy sifatida, balki media olamida ham faol ishtirok etmoqda. Kannavaro bugun kechasi Yevropa Chempionlar Ligasi 3-turidan o‘rin olgan jahon futbolidagi eng kutilgan uchrashuv — «Real Madrid» va «Yuventus» bahsida Amazon Prime Video‘ning italyan tilli versiyasi uchun jonli sharhchi sifatida ishtirok etadi.
Ma’lumotlarga ko‘ra, Kannavaro bir necha kun avval Yevropaga yo‘l olgan va Madridga yetib borishi bilan Amazon Prime jamoasi bilan shartnoma bo‘yicha kelishuvni yakunlagan. Endi u «Santyago Bernabeu» arenasidan turib to‘g‘ridan to‘g‘ri efirda o‘z fikrlarini bildirish, o‘yin oldidan va keyin bahsni tahlil qilish bilan shug‘ullanadi.
Bu kabi amaliyot Yevropada ancha keng tarqalgan — ko‘plab taniqli sobiq futbolchilar yoki murabbiylar telekanallar va striming platformalar studiyalarida mehmon sifatida qatnashib, jonli bahslarni tahlil qilishadi. Ular muxlislarga nafaqat o‘yin jarayoni haqida, balki taktik yondashuvlar va jamoalarning ichki tayyorgarligi borasida ham qiziqarli ma’lumotlar beradi.
Kannavaro ham aynan shunday formatda Amazon Prime studiyasida o‘zining mutaxassislik fikrlarini baham ko‘radi. Uning ishtirokidagi jonli efir «Real Madrid» – «Yuventus» bahsi oldidan va tanaffus hamda o‘yindan so‘ng efirga uzatiladi.
Fabio Kannavaro bu safargi chiqishida faqat italyan auditoriyasi uchun emas, balki jahon futboli muxlislari uchun ham qiziq shaxs. Uning so‘zlari ko‘pincha Yevropa sport OAVlarida tahlil sifatida keltiriladi. Murabbiyning Instagram sahifasida ham u stadiondan olingan kadrlarni joylashtirib, «bu yerda bo‘lish har doim alohida his» deb yozgan.
Ma’lumot uchun, mazkur bahs bugun tungi soat 00:00 da start oladi. Chempionlar ligasida «Real Madrid» o‘z maydonida «Yuventus»ni qabul qiladi. Kannavaro uchun bu uchrashuv alohida ahamiyatga ega — u o‘z vaqtida «Yuventus» sharafini himoya qilgan, keyinchalik esa «Real»da ham bir necha mavsum faoliyat yuritgan. Shu sababli, bu ikki jamoa o‘rtasidagi bahs unga nafaqat ish, balki ehtiros va xotiralarni ham esga soladi.
Futbol muxlislari uchun bu kecha nafaqat maydondagi to‘qnashuv, balki uning ortida turib jonli efirda so‘zlovchi Kannavaroning tahlili bilan ham esda qolishi aniq.
“Zamin”ni Telegramʻda oʻqing!
